ئیکسۆن مۆبیل و وەزارەتی نەوتی عێراق ڕێککەوتنێک واژۆ دەکەن

ئاڤا نیوز

دوای ساڵ لە جێهێشتنی کەرتی نەوتی عێراق، کۆمپانیای ئیکسۆن مۆبیل کە یەکێکە لە کۆمپانیا گەورەکانی بواری نەوتی ئەمریکا و جیهان، دووبارە بۆ عێراق گەڕایەوە و بۆ وەبەرهێنان لە کێڵگەی نەوتی مجنونی باشووری عێراق و نوێکردنەوەی ژێرخانی هەناردەی نەوت، ڕێککەوتنێکی لەگەڵ وەزارەتی نەوتی فیدڕاڵ واژۆ کرد.

 

وێنە گەورەکە: بەیانی ئەمڕۆ میدیا جیهانییەکان لەوانەش ڕۆیتەرز و ئاژانسی بلومبێرگ بڵاویانکردەوە، کۆمپانیای ئیکسۆن مۆبیلی ئەمریکی، دوای دوو ساڵ کشانەوەی لە کەرتی نەوتی عێراق، تاوتوێی گەڕانەوەی بۆ وڵاتەکە و دەستکردن بە پرۆسەی گەڕان و وەبەرهێنانی نەوت لە کێڵگەی "مجنون"ـی باشووری عێراق دەکات.

 

ڕاگەیێنراوی فەرمی: نووسینگەی سەرۆکوەزیرانی عێراق بڵاوی کردەوە، محەممەد شیاع سوودانی، سەرۆکوەزیران سەرپەرشتی ڕێککەوتنی سەرەتایی نێوان کۆمپانیای ئیکسۆن مۆبیلی ئەمریکیی و وەزارەتی نەوتی فیدڕاڵی کرد، ئەویش لە چوارچێوەی پێشوازی کردنی لە پیتەر لاردن، جێگری سەرۆکی کۆمپانیای ئیکسۆن مۆبیل بە ئامادەبوونی هەڵسوڕێنەری کاروباری باڵیۆزخانەی ئەمریکا لە بەغدا.

 

سەرۆکوەزیرانی عێراق لە مەڕاسیمەکەدا ڕایگەیاند، ئەم ڕێککەوتنە بۆ داهاتووی کەرتی نەوتی عێراق و پەیوەندییەکانی بەغدا و واشنتن هەنگاوێکی گرنگە و عێراقیش دەرگای بۆ وەبەرهێنانی کۆمپانیا گەورەکانی بواری نەوت لە جیهاندا کراوەیە، بەتایبەتیش کە ئێستا کۆمپانیا گەورەکان لەوانەش ئەمریکییەکان لە کێڵگە نەوتییە گرنگەکاندا کار دەکەن لەوانەش کێڵگەی مجنون لە بەسرە، حکومەتیش لەسەر کارئاسانی بۆ هێنانی وەبەرهێنانی بیانی لەبوارەکانی وزە و غازدا پێداگر و بەردەوام دەبێت.

 

ئاماژەی بەوەشکرد، گرنگە کە کۆمپانیای ئیکسۆن مۆبیل لە بواری نوێکردنەوەی ژێرخان بۆ هەناردەی نەوتی عێراق ڕۆڵ بگێڕێت، هاوکاریش بێت لە فرەجۆرکردنی ڕێگاکانی هەناردە، بەکارهێنانی نوێترین ئامێر و تەکنەلۆژیای سەردەم لەبواری پیشەسازی نەوت و زیادکردنی بەرهەمهێنانی نەوت لە وڵاتدا.