ئیکسۆن مۆبیل بۆ کەرتی نەوتی عێراق دەگەڕێتەوە

ئاڤا نیوز

 

کۆمپانیای ئیکسۆن مۆبیلی ئەمریکی کە یەکێکە لە گەورەترین کۆمپانیا نەوتییەکانی جیهان، دوای دوو ساڵ کشانەوەی لە کەرتی نەوتی عێراق، ئێستا تاوتوێی گەڕانەوەی بۆ وڵاتەکە و دەستکردن بە پرۆسەی گەڕان و وەبەرهێنانی نەوت لە کێڵگەی "مجنون"ـی باشووری عێراق دەکات.

 

وێنە گەورەکە: دوو ساڵ لەمەوبەر کۆمپانیای ئیکسۆن مۆبیل کۆتایی بە کارەکانی لە کێڵگەی رۆژئاوای قوڕنە لە پارێزگای بەسرە هێنا و و کۆمپانیای پێترۆچاینای چینی شوێنەکەی گرتەوە، بەڵام ئەمجارە کۆمپانیاکە بۆ وەبەرهێنان لە کێڵگەی مجنون دەگەڕێتەوە کە بەدووری 60 کیلۆمەتر کەوتووەتە دووری شاری بەسرە و یەدەگی نەوتی ئەم کێڵگەیە بە 38 مليار بەرمیل دەخەمڵێنرێت، بەوەش بووەتە یەکێک لە دەوڵەمەنترین کێڵگە نەوتییەکانی جیهان.

 

لێدوانی فەرمی: وتەبێژی کۆمپانیای ئیکسۆن مۆبیل بە ئاژانسی ڕۆیتەرزی ڕاگەیاندووە، کۆمپانیاکەیان لەگەڵ وەزارەتی نەوتی عێراق لە گفتوگۆدایە و چاویان لە دەرفەتێکی باشە بۆ وەبەرهێنان لەو وڵاتەدا.

 

ئاژانسی بلومبێرگیش لە چەند سەرچاوەیەکی ئاگادارەوە بڵاوی کردەوە، ئیکسۆن مۆبیل پلانی داناوە لە چەند ڕۆژی داهاتوودا ڕێککەوتن لەگەڵ کۆمپانیای نەوتی بەسرە و کۆمپانیای سۆمۆ واژۆ بکات، پڕۆژەکانیش دروستکردنی ژێرخان بۆ هەناردە و پڕۆژەی دیکەی بەبازاڕکردنی نەوت لە باشووری عێراق لە خۆدەگرێت.

 

خاڵە ئەرێنییەکان: کۆمپانیای ئیکسۆن مۆبیل تاکە کۆمپانیای گەورەی جیهانی نییە کە بۆ وەبەرهێنان لە کەرتی نەوت و غازدا دەگەڕێتەوە عێراق، لە ماوەی ڕابردووشدا کۆمپانیاکانی شیڤرۆنی ئەمریکی، تۆتاڵ ئینێرجی فەڕەنسی و بی پی بەریتانی بۆ وەبەرهێنان بۆ عێراق گەڕاونەتەوە و ئێستا بەگوێرەی ڕێککەوتن لەگەڵ حکومەتی عێراق کاردەکەن.