ڕێکارەکانی ناردنی مووچەی مانگی هەشت دەکەوێتە هەفتەی داهاتوو

ئاڤا نیوز

بڕیاری خەرجکردنی مووچە و ناردنی داهاتی ناوخۆ بۆ هەفتەی داهاتوو دواخراوە. حکومەتی هەرێمی کوردستان تەنیا یەک پابەندبوونی لەسەرە سەبارەت بە مووچەی مانگی هەشت، کە بریتییە لە ناردنی 120 ملیار دینار لە داهاتی ناوخۆ، ئەویش ئامادەیە.

وێنە گەورەکە: دوای خەرجکردنی مووچەی مانگی حەوتی فەرمانبەرانی کوردستان، هەوڵەکان چڕ کرانەوە بۆ خەرجکردنی مووچەی مانگی هەشت، ڕۆژی سێشەممە دوای کۆبوونەوەی ئەنجوومەنی وەزیرانی عێراق، سێ وەزیری کورد لەگەڵ سوودانی کۆبوونەوە، سوودانی بەڵێنی خەرجکردنی مووچەی مانگی هەشتی بە وەزیرە کوردەکان دا.

لێدوانی فەرمی: سەرچاوەیەک لە وەزارەتی دارایی و ئابووریی هەرێمی کوردستان بە ئاڤای ڕایگەیاند، داهاتەکەیان کۆکردووەتەوە و 120 ملیار دینار ئامادەیە. هەرکاتێک بەغدا ئاگاداریان بکاتەوە و بڕیاری دەستپێکردنی ڕێکارەکانی خەرجکردنی مووچەی مانگی هەشت بدات، ئەوا لە ماوەی 24 بۆ 48 کاتژمێردا تەواوی پارەکە بە کاش دەدەنە لقی هەولێری بانکی ناوەندی.

ئەوەی پێویستە بیزانیت: ناردنی داهاتی ناوخۆ پێویستی بە بڕیاری ئەنجومەنی وەزیرانی کوردستان نییە، چونکە لە کۆبوونەوەی هەفتەی ڕابردوودا ئاوات شێخ جەناب، وەزیری دارایی و ئابووری، سەرپشک کرا لەوەی مانگانە 120 ملیار دینارەکە بۆ بەغدا بنێرێت.