ئاڤا نیوز ڕێنماییەکانی دابەشکردنی زەویی خانەنشینان بڵاو دەکاتەوە

ئاڤا نیوز

 

سبەی لە بانکەکان پرۆسەی دابەشکردنی فۆڕمی وەرگرتنی زەوی بەسەر خانەنشینان دەستپێدەکات، ئەوانەی نیشتەجێی دەرەوەی وڵاتیشن دەتوانن لێی سوودمەند بن.

 

وێنە گەورەکە: لە هەرێمی كوردستان زیاتر لە 277 هەزار خانەنشینی شارستانی و سەربازی هەیە، بەشێكیان ل ەوەرگرتنی زەوی سوودمەند نەبوون، بەشێک دەبن لەو 200 هەزار کەسەی زەوییان پێدەدرێت.

 

لێدوانی فەرمی: سەربەست مەولوود، بەڕێوەبەری گشتیی کاروباری یاسایی لە وەزارەتی شارەوانی بە ئاڤا نیوزی گوت، "پڕۆسەی دابەشکردنی زەوی خێرا کراوە، ئامانجەکەش ئەوەیە پێش کۆتایی ئەمساڵ پرۆسەکە دەستپێبکات".

 

ڕێنماییەکان چین؟

1.    ئەو فۆڕمەی دەدرێت بە خانەنشیان پێویستە مۆری خانەنشینی لەسەر بێت.

2.    تەنیا ئەو خانەنشینانەی لە ژیاندا ماون و لە وەرگرتنی زەوی سوودمەند نەبوون، دەتوانن فۆڕمەکە پڕبکەنەوە.

3.    پەسەندکردنی فۆڕمەکە لای بەڕێوەبەرایەتیی خانەنشینی دەبێت.

4.    جگە لە ڕاژەی کارا و گرێبەست، هیچ ڕاژەیەکی دیکە تۆمار ناکرێت.

5.    خانەنشینانی دەرەوەی وڵات دەتوانن فۆڕمەکە پڕ بکەنەوە.

6.    میراتگری خانەنشینی کۆچکردوو ناتوانێت فۆڕمەکە پڕ بکاتەوە.

7.    سوود لە ڕاژەی خانەنشینی وەرناگرێت، کە وەک پشتگیری داوا دەکرێت.

8.    ئەو بەڕێوەبەرایەتییانەی خانەنشینی کە هۆبەی یاساییان هەیە دەتوانن فۆڕمەکە پەسەند بکەن.

9.    کۆپی بەڵگەنامەکانی (کارتی نیشتمانی، کارتی زانیاریی و ناسنامەی خانەنشینی) هاوپێچی فۆڕمەکە دەکرێن.