لاهوور شێخ جەنگی: ئەوەى لە سلێمانى ڕووی داوە بافڵ تاڵەبانى لێى بەرپرسە

ئاڤا نیوز 

 

سەرۆکی بەرەی گەل ڕایدەگەیێنێت، ئەوەى لە سلێمانى ڕووی داوە جێگەی قبووڵ نییە و بافڵ تاڵەبانى لێى بەرپرسە.

 

وێنە گەورەکە: شەوی ڕابردوو لە گەڕەکی ڕاپەڕینی سلێمانی، چایچییەک بە ناوی ئاری ڕزگار تەمەن 30 ساڵ بە دەستڕێژی گولـلە کوژرا، هەفتەی ڕابردووش کەسێکی دیکە لەلایەن کارمەندێکی کۆماندۆ کوژرا.

 

لێدوانی فەرمی: لاهوور شێخ جەنگی، سەرۆکی بەرەی گەل بە میدیای حیزبەکەی ڕاگەیاند: ئەوەی لە سلێمانی دەگوزەرێت لە هیچ شوێنێکی دونیا ناگوزەرێت و بەپێی یاسای هێزەکانی ناوخۆ تەنیا پۆلیس و ئاسایش دەتوانن خەڵک دەستگیر بکەن، بەڵام ئەوەی لە سلێمانی هەیە پێچەوانەیە و پۆلیس و ئاسایش هیچ دەسەڵاتێکی نەماوە و هێزی کۆماندۆ لەناو شارەکان دەگەڕێت و خەڵک دەستگیر دەکات و دەیانکوژێت.

 

زانیاریی زیاتر: "ئەوەی ڕوودەدات جێگەی قبووڵکردن نییە و خودی بافڵ تاڵەبانی بەرپرسیارە لەمە، ڕۆژێک پێشتر سەردانی هێزەکانی کۆماندۆی کردووە و دەستخۆشی لێ کردوون، لەبەرامبەردا ئەو هەموو نادادپەروەری و دەستدرێژییە بەرامبەر خەڵک دەکەن" سەرۆکی بەرەی گەل وای گوت.

 

قووڵتر: لاهوور شێخ جەنگی پێیوایە بافڵ تاڵەبانی و قوباد تاڵەبانی دامودەزگا حکومییەکانی سلێمانیان تێکداوە و دەشڵێت، "هێزەکانی دژەتیرۆر و کۆماندۆ بۆیان نییە خەڵک دەستگیر بکەن".

 

بۆچوونی لایەنی بەرامبەر: بافڵ تاڵەبانی، سەرۆکی یەکێتی پەیامێکی لەبارەی ڕووداوەکە بڵاوکردەوە و ڕیگەیاند: "دەبمە پارێزەری بنەماڵەی سەربەرزی کاکە ئاری تاوەکو ئەم دۆسیەیە ڕێڕەوی یاسایی خۆی وەربگرێت".

 

لەلایەکی دیکەوە: لەبارەی دامەزراوە ئەمنی و سەربازییەکانیش دەڵێت: "هەر کەسێک لە هەر پلە و پۆستێکدا بێت و یاساشکێنی بکات، یاخود ببێتە هۆی دروستکردنی پشێوی و پاڵپشتی هەر تاوانێک بکات، ڕادەستی یاسا دەکرێت و هیچ لێخۆشبوونێک بۆ ئەو کەسانە نییە کە ژیان و سەقامگیریی خەڵک دەخەنە مەترسییەوە".