مادورۆ بۆ سێیەمجار بە سەرۆکی ڤەنزوێلا هەڵبژێردرا

ئاڤا نیوز

ئەنجامی فەرمیی هەڵبژاردنەکانی سەرۆکایەتیی ڤەنزوێلا ڕاگەیێنرا و نیکڵاس مادورۆ، سەرۆکی ئێستای ڤەنزوێلا، جارێکی دیکە بووەوە براوەی هەڵبژاردن.

وێنە گەورەکە: بەگوێرەی ئەنجامەکان کە کۆمیسیۆنی هەڵبژاردنی ڤەنزوێلا ڕایگەیاندوون، مادورۆ 51.2٪ـی دەنگەکانی بەدەستهێناوە، بەمپێیە بۆ جاری سێیەم دەبێتەوە بە سەرۆکی وڵات. لە بەرامبەریشدا ئێدموندۆ گۆنزالێز 44.2٪ـی دەنگەکانی بەدەستهێناوە.

لێدوانی فەرمی: مادورۆ لە بەردەم کۆشکی سەرۆکایەتی قسەی بۆ ئاپۆڕای لایەنگرانی کرد و گوتی: دووبارە هەڵبژاردنەوەی ئەو "سەرکەوتنی ئاشتی و سەقامگیری و دادپەروەرییە". ڕاشیگەیاند فەرمانێک بۆ ئەنجامدانی "دیالۆگی مەزنی نیشتیمانی" دەردەکات.

بۆچوونی بەرامبەر: ئۆپۆزیسیۆن ڕایگەیاندووە بە ئەنجامەکان ڕازی نابێت و ئەوان توانیویانە 70٪ـی دەنگەکان بەدەستبێنن.

لەلایەکی دیکەوە: چیلی ڕایانگەیاندوە باوەڕکردن بە ئەنجامەکان "ئاستەم"ـە. هەروەها پیرۆ باڵیۆزی خۆی لە ڤەنزوێلا "بۆ ڕاوێژکردن" بانگهێشت کردووەتەوە. کۆستاریکاش سەرکەوتنی مادورۆی بە "ساختە" ناو بردووە.