کچە هەڵاتووەکەی چاکسازیی ژنانی سلێمانی دەستگیر کرایەوە

ئاڤا نیوز

دوای 24 کاتژمێر کچە هەڵاتووەکەی چاکسازیی ژنانی سلێمانی لەلایەن هێزە ئەمنییەکان دەستگیر کرایەوە.

چیرۆکی سەرەکی: دوانیوەڕۆی دوێنێ یەکشەممە لە چاکسازیی ژنان و منداڵانی سلێمانی کچێکی تەمەن 16 ساڵ ڕایکرد، دەستبەجێش لیژنەیەکی لێکۆڵینەوە پێکهێنرا.

زانیاریی زیاتر: بەپێی دیمەنی کامێراکانی چاودێری، دوای ئەوەی پاسەوانێک بۆ چەند خولەکێک دەچێتە ژوورەوە، ئەو کچە لەسەر دیواری چاکسازییەکە خۆی هەڵدەدات و لەسەر کابینەیەکەوە بە دیواری دووەم دەپەڕێتەوە کە هەمووی تەلبەند کراوە، بەوشێوەیە توانیویەتی هەڵبێت، بە تەلبەندەکەشەوە خوێن بینراوە و لە کاتی ڕاکردن دەست و دەموچاوی بریندار بووە.

لێدوانی فەرمی: کوێستان محەممەد، وەزیری کار و کاروباری کۆمەڵایەتیی حکومەتی هەرێمی کوردستان بە ئاڤا نیوزی گوت: لەلایەن مەفرەزەکانی چاکسازیی ژنان و منداڵانی سلێمانییەوە لە هەواری شار دەستگیر کراوەتەوە.

 

هۆکارە زانراوەکان: کچەکە بە ماددەی حەوتی تووندوتیژی خێزانی لەسەر داوای دایکی ڕاگیرابوو، بڕیار بوو بەکەفالەت ئازاد بکرێت و بگەڕێتەوە ناو خێزانەکەی، بەڵام ئەو نەیویستووە بگەڕێتەوە بۆیە هەڵاتووە.