وردەکاری بریندارکردنی دوو کرێکار لەلایەن ئەندامێکی کۆماندۆ

ئاڤا نیوز

 

کارمەندێکی کۆماندۆ دوو کرێکار بریندار دەکات، بەڵام دوای دوو ڕۆژ لە دەستگیرکردنی سوڵحی بۆ کراوە و بڕیارە ئەمڕۆ ئازاد بکرێت.

 

چیرۆکی سەرەکی: دوو ڕۆژ لەمەو پێش کارمەندێکی کۆماندۆ لەگەڵ کرێکارێك دەبێتە دەمەقاڵەی و کارمەندەکەی کۆماندۆ تەقەی لێکردووە و برینداری کردووە، پاشان کرێکارێکی هاوەڵی ویستوویەتی نێوبژیوانی بکات و ئەویشی بریندار کردووە.

 

چی ڕوویدا: ڕۆکان مەحموود، پەیامنێری ئاڤا نیوز لە کەرکووک گوتی: "ڕوووداوەکە لە بانی مەقان بووە، سەرەتا کارمەندەکەی کۆماندۆ دەبێتە دەمەقاڵێی لەگەڵ یەکێک لە کرێکارەکان گوللـەیەک لە قاچی دەدات و قاچی دەشکێنێت، دواتر کرێکارێکی دیکە دێت بۆ بەرگری لە هاوەڵەکەی، بەڵام تەقە لەویش دەکات و قاچی ئەویش دەشکێنێت".

 

زانیاریی زیاتر: دوای ڕووداوەکە کارمەندەکەی کۆماندۆ لەلایەن ئاسایشی چەمچەماڵ دەستگیرکراوە، هەرچەندە ئەمڕۆ سوڵحی عەشایەری كراوە و بڕیارە ئەمڕۆ كارمەندەكە ئازاد بكرێت.
ڕۆکان مەحموود ئەوەشی گوت.

 

وێنە گەورەكە: لەماوەی كەمتر لە 15 ڕۆژدا ئەمە چوارەم ڕووداوی تەقەكردن و كوشتن و ڕفاندنە كە ئەندامانی كۆماندۆ تێیدا بكەری سەرەكین، لەكاتێكدا ئەو هێزە سەر بە یەكەی 70 ی پێشمەرگەیە و ڕاستەوخۆ لەلایەن بافڵ تاڵەبانی سەرۆكی یەكێتییەوە فەرمانیان پێدەكرێت.