ئێران دەیەوێت قەبارەی بازرگانی لەگەڵ هەرێمی کوردستان زیاتربکات

ئاڤا نیوز

شاندێکی بازرگانی ئێران کە پێکهاتبوون لە ئەندامانی ژووری بازرگانی پارێزگای قەزوین و 50 کۆمپانیا بە نوێنەرایەتی 500 کۆمپانیای ئەو وڵاتە، سەردانی ژووری بازرگانی هەولێریان کرد و کۆمپانیاکان پێشانگایەکی نێودەوڵەتیان بۆ ماوەی چوار ڕۆژ بۆ ناساندنی بەرهەمەکان لە هەولێر کردەوە.

وێنە گەورەكە: لەشەش مانگی ئەمساڵدا، قەبارەی بازرگانی نێوان کۆماری ئیسلامی ئێران و هەرێمی کوردستان دوو ملیار و 400 ملیۆن دۆلار بووە، لەساڵی ڕابردووش شەش ملیار دۆلار بووە.

لێدوانی فەرمی: شاندەکە بانگهێشتنامەیان بۆ ئێمە نووسی بۆ ئەوەی کۆمەڵێک بازرگانانی کوردستان بنێرین بۆ قەزوین بەمەبەستی فراوانکردنی ئاڵوگۆڕی بازرگانی و بەهێزکردنی پەیوەندییە بازرگانییەکان بەمزووانە شاندێکی بازرگانی دەنێرینە ئێران". کامەران باجگر، جێگری سەرۆکی ژووری بازرگانی هەولێر ئەمەی بە ئاڤا نیوز گوت.

لە لایەکی دیکەوە: عەلی ڕەحمانی، یاریدەدەری ئابووری پارێزگاری قەزوین بە ئاڤا نیوزی ڕاگەیاند:" ئێمە نووسراومان داوەتە ژووری بازرگانی هەولێر ئەگەر ڕەزامەندبن، دەتوانین شارێکی پیشەسازی لە هەرێمی کوردستان دابمەزرێنین، چونکە لەوبوارەدا ئەزموونی زۆرمان هەیە".