سبەی هەموو عێراق و هەرێمی کوردستان خولەکێک دەوەستێت

ئاڤا نیوز  

 

ئەنجومەنی وەزیرانی عێراق بڕیاریداوە، سبەی شەممە لە سەرجەم پارێزگاکانی عێراق کاتژمێر 10ی بەیانی بۆ ساڵیادی تاوانی جینۆسایدی ئێزدییەکان بۆ ماوەی خولەکێک هاتووچۆ بوەستێت، لە هەرێمی کوردستانیش بە فەرمانی سەرۆکوەزیران بارزانی خولەکێک هاتوچۆ ڕادەگیرێت.

 

وێنە گەورەکە: پەرلەمانی کوردستان لە سێی ئابی 2019 بڕیاریدا هەموو ساڵێک ئەو ڕۆژە بکرێت بە یادی جینۆسایدی ئێزدییەکان، تا ئێستا هەریەکە لە پەرلەمانەکانی بەریتانیا، هۆڵەندا، ئەڵمانیا، ئەرمینیا و بەلجیکا ئەو تاوانەیان بە جینۆساید ناساندووە.

 

لێدوانی فەرمی: ئومێد خۆشناو پارێزگاری هەولێر بە ئاڤا نیوزی ڕاگەیاند: جگە لەوەی بڕیاری لێدراوە، سبەی لە هۆتێل ڕۆتانا بۆنەیەک بۆ یادی ئەو تاوانە ڕێکدەخرێت.

لە لایەکی دیکەوە: د.هەڤاڵ ئەبوبەکر، پارێزگاری سلێمانی بە ئاڤا نیوزی گوت: لە ساڵیادی ئەو تاوانەی بەسەر خوشک و برا ئێزدییەکانمان هات، بۆ پشتیوانیکردنی بڕیاری هەردوو سەرۆکوەزیرانی عێراقی فیدراڵ و هەرێمی کوردستان، سبەی یەک خولەک دەوەستین و هاتوچۆ ڕادەگرین.

زانیاریی زیاتر: لە پارێزگای دهۆکیش سبەی هاتوچۆ لە شەقامەکان بۆ ماوەی خولەکێک دەوەستێت، ئەمەش بەپێی گوتەی محەممەد ئیسماعیل قایمقامی دهۆک.

 

باکگراوند: ڕۆژی سێی ئابی 2014 چەکدارانی ڕێکخراوی "داعش" هێرشیان بۆسەر قەزای شەنگال دەستپێکرد، بەهەزاران کوردی ئێزدی کوژران و ڕفێنران.