دابەشکردنی فۆڕمی وەرگرتنی زەوی لە سنووری ماددەی 140 دەست پێدەکات

ئاڤا نیوز

 

ڕێکارەکانی دابەشکردنی زەوی به‌سه‌ر فه‌رمانبه‌رانی كه‌ركووك و ناوچە دابڕێنراوەکانی هەرێمی کوردستان ده‌ستپێدەکات و فەرمانبەران بەشێوازی ئەلیکترۆنی فۆڕمیان پێدەگات.

 

وێنە گەورەکە: بە فەرمانی سەرۆکوەزیران بارزانی، ئەو فەرمانبەرانەی هەرێمی کوردستان کە لە سنووری ماددەی 140 دەوام دەکەن، لە وەرگرتنی زەوی سوودمەند دەبن و، نزیکترین سنووری شارەوانی کە سەر بە هەرێمی کوردستان بێت، زەویان پێدەدرێت.

 

لێدوانی فەرمی: کامەران عەلی، بەڕێوەبەری خوێندنی کوردی لە کەرکووک بە ئاڤا نیوزی گوت، "فۆڕمی داواکردنی زەوی و پڕکردنەوەی بەڵێننامە بە ئەلیکترۆنی بۆ سەرجەم قوتابخانەکان نێردراوە، دوای پڕکردنەوەیان بۆ ئێمەی دەگەڕێننەوە، دواتریش بۆ وەزارەتی شارەوانی حکومەتی هەرێمی کوردستان دەنێردرێت."

 

زانیاریی زیاتر: ئەو فەرمانبەرانە لە نزیکترین شوێنی جوگرافی خۆیان لە وەرگرتنی زەوی سوودمەند دەبن، ئەگەر لە سنووری ماددەی 140 نیشتەجێ بن، لەو ناوچانەی لەژێر دەسەڵاتی هەرێمی کوردستانن زەویان بۆ تەرخاندەکرێت، بەڕێوەبەری خوێندنی کوردی لە کەرکووک وای گوت.