مووچه‌ی په‌رله‌مانتارانی عێراق كه‌مدەکرێتەوە

ئاڤا نیوز  

بڕیاری دادگەی فیدراڵی بۆ کەمکردنەوەی مووچەی پلە باڵاکان چووە بواری جێبەجێکردنەوە و لەم مانگەوە مووچه‌ی په‌رله‌مانتارانی عێراق که‌مکرایه‌وه‌.

وێنە گەورەکە: بەگوێرەی بڕیارێکی حەیدەر عەبادی سەرۆکوەزیرانی پێشووتری عێراق، مووچەی هەموو پلەباڵاکان کەمکرایەوە، بەڵام تا مانگی تەمموز، دەستکاری مووچەی پەرلەمانتاران نەکرابوو بەهۆی ئەوەی بۆچوونێک هەبووە کە پەرلەمانتار وەک پلەباڵا هەژمار نەکرێت بەوەش مووچەکەیان بە جێگیری مایەوە کە هەشت ملیۆن و 200 هەزارە.

‌لێدوانی فەرمی: غەریب ئەحمەد، ئەندامی پەرلەمانی عێراق بە ئاڤا نیوزی گوت: دوای تۆمارکردنی سکاڵایەک لە دادگەی فیدڕاڵی لەلایەن پەرلەمانتارێکەوە، دادگە بڕیاریدابوو، بڕیارێکی حکومەتەکەی حەیدەر عەبادی کارا بکرێتەوە بۆ کەمکردنەوەی مووچەی پەرلەمانتاران، بۆیەش مووچەی مانگی ڕابردووی پەرلەمانتاران کەمکراوەتەوە و بڕیارەکە چووەتەبواری جێبەجێکردنەوە.

ئەوەی پێویستە بیزانیت: دوای بڕیارەکە، مووچه‌ی ئه‌و په‌رله‌مانتارانه‌ی بڕوانامه‌ی ئاماده‌ییان هه‌یه‌ دوو ملیۆن و 800 هه‌زار دینار که‌میکردووه‌، هه‌روه‌ها ئه‌و په‌رله‌مانتارانه‌ی بڕوانامه‌ی دیپلۆمیان هه‌یه‌ مووچەکانیان زیاتر له‌ دوو ملیۆن دینار که‌میکردووه‌، مووچه‌ی ئه‌و په‌رله‌مانتارانه‌شی که‌ بڕوانامه‌ی به‌کالۆریۆسیان هه‌یه‌ ملیۆنێک و 450 هه‌زار دینار که‌میکردووه‌، به‌ڵام مووچه‌ی ئه‌و په‌رله‌مانتارانه‌ی بڕوانامه‌ی ماسته‌ریان هه‌یه‌ وه‌ک خۆی ماوه‌ته‌وه‌، ئه‌و په‌رله‌مانتارانه‌شی کە بڕوانامه‌ی دکتۆرایان هه‌یه‌ مووچه‌کانیان زیادیکردووە.