بایدن لێدوانەکانی ترەمپ لەبارەی ناتۆ سەرکۆنە دەکات

ئاڤا نیوز

جۆ بایدن، سەرۆکی ئەمریکا، لێدوانەکانی دۆناڵد ترەمپ، سەرۆکی پێشووی ئەمریکا و یەکێک لە بەربژێرکانی کۆمارییەکان بۆ سەرۆکایەتیی ئەمریکا، سەبارت بە ناتۆ سەرکۆنە دەکات. ترەمپ گوتبووی ئەگەر ئەندامانی ناتۆ بەشە بودجەی ڕێکخراوەکە دابین نەکەن، ئەوا لە ئەگەری هێرشی ڕووسیا بۆ سەریان، ئەمریکا بەرگرییان لێ ناکات.

ڕاگەیێنراوی فەرمی: جۆ بایدن دەڵێت، ڕێبەرایەتیی ئەمریکا لە گۆڕەپانی جیهان و بەرگریکردن لە هاوپەیمانانمان بۆ پاراستنی ئاسایشی خەڵکی ئەمریکا لە ناوخۆ زۆر گرنگە. ئەگەر ڕکابەرەکەی من، دۆناڵد ترەمپ، جارێکی دیکە بێتەوە سەر دەسەڵات ئەوا ڕوونە لە ئەگەری هێرشی ڕووسیا، پشت دەکاتە هاوپەیمانەکانی ناتۆ و ڕێگە دەدات ڕووسیا چی بووێت بەسەریان بهێنێت.

لەلایەکی دیکەوە: وەزارەتی دەرەوەی ئەڵمانیا ڕەخنەی لە لێدوانەکەی ترمپ گرتووە، لە تۆڕی ئێکس هاژتاگێکی بە ناوی "پێکەوە بەهێزترین" دروست کردووە و نووسیویەتی: یەکێک بۆ هەمووان و هەمووان بۆ یەکێک. بەهەمانشێوە وەزیری بەرگریی پۆڵەندا، سەرۆکی کۆمیسیۆنی ئەوروپا و چەندین بەرپرسی دیکەی ئەورپا و ناتۆ دژی لێدوانەکەی ترەمپ قسەیان کردووە.

زانیاریی زیاتر: هاپەیمانێتیی باکووری ئەتڵەسی - ناتۆ، هاوپەیمانێتییەکی سەربازییە و لە 31 دەوڵەت پێکدێت. ئەندامەکانی لەسەر تەرخانکردنی بڕی 2% لە داهاتی ناوخۆییان بۆ ڕێکخراوەکە ڕێککەوتوون؛ بەڵام تا ئێستا تەنیا 11 ئەندام ئەم بڕە لە بەشە بودجەیان تەرخان کردووە.

ئەمەش بزانە: بەگوێرەی ماددەی 5 لە پەیماننامەی ناتۆ هێرشکردنە سەر هەر ئەندامێکی ناتۆ بە واتای هێرشکردنە سەر هەموو ئەندامانی ڕێکخراوەکە دێت.