پۆلیسی ڕاپەڕین: ئەوەی ڕوویداوە هێرشی چەکداری نەبووە

ئاڤا نیوز  

لەچەند پەیج و ماڵپەڕێکی عەرەبی، دەنگۆی هێرشێکی چەکداری لە ئیدارەی سەربەخۆی ڕاپەڕین بڵاوکراوەتەوە، بەڵام پۆلیسی ئەو ناوچەیە ئەو دەنگۆیانە ڕەتدەکاتەوە.

لێدوانی فەرمی: ڕائید ڕابەر حەسەن، گوتەبێژی پۆلیسی ڕاپەڕین بە ئاڤا نیوزی ڕاگەیاند: ئەوەی ئەمڕۆ هەینی ڕوویداوە هێرشی چەکداری نەبووە، بەڵکو کەسێکە لە شاردەێی بۆسکین گولـلەی لەدەست دەرچووە.

چیرۆکی سەرەکی: دوای نیوەڕۆی ئەمڕۆ کوڕ و باوکێک هێنراوەتە نەخۆشخانەی گشتی ڕاپەڕین دەرکەوت بریندارن، کوڕەکە تەمەن 28 ساڵ گوتویەتی؛ لەکاتی پاککردنەوەی چەک گولـلەم لە دەست دەرچووە و بریندار بووم، باوکەکەش کە تەمەنی 55 ساڵە و پیشەی پۆلیسی بەرگریی فریاکەوتنە لەو کاتە لەسەر بان هاتووەتە خوار ڕایکردووە و بەربووەتەوە بریندار بووە. ئەمە بە گوتەی پۆلیسی ڕاپەڕین.

زانیاريی زیاتر: پۆلیسی ڕاپەڕین دەڵێت: ئەو چەکەی لای کوڕەکە بووە، دەستی بەسەرداگیراوە و لێکۆڵینەوە بەردەوامە.

باکگراوند: ئیدارەی سەربەخۆی ڕاپەڕین، لە هەردوو قەزای ڕانیە و پشدەر پێکدێت و سەنتەری ئیدارەکە ڕانیەیە.