ئاڤا نیوز ڕێککەوتنی یەکێتی و لایەنە عەرەبییەکان لەبارەی پارێزگاری کەرکووک ئاشكرا دەکات

ئاڤا نیوز  

ئێوارەی ئەمڕۆ کۆبوونەوەی ئەنجوومەنی پارێزگای کەرکووک لە بەغدا دەکرێت، بەشێک لە لایەنەکان لەسەر دابەشکردنی پۆستی پارێزگار و سەرۆکی ئەنجوومەنەکە گەیشتوونەتە ڕێککەوتن، فراکسیۆنی پارتیش بێئاگایی لە هەر جۆرە ڕێککەوتنێک پیشان دەدات.

وێنە گەورەكە: سبەی ئەو وادەیەی بۆ دیاریكردنی پارێزگار و دابەشكردنی پۆستەكانی پارێزگای كەركووك دیاری كراوە كۆتایی دێت.

زانیاریی بەدەستهاتوو: بەپێی ئەو زانیاریانەی دەست ڕۆکان مەحموود پەیامنێری ئاڤا کەوتووە: بڕیارە کاتژمێر 08:00ی ئێوارەی ئەمڕۆ شەممە 10-8-2024 لە هۆتێل ڕەشید لە بەغدا کۆبوونەوەی ئەنجوومەنی پارێزگای کەرکووک بە بەشداری زۆرینەی لایەنەکان بکرێت.  

ڕێککەوتنەکە بەم جۆرەیە: پارێزگار بۆ ماوەی ساڵێک و چوار مانگ بۆ یەکێتی دەبێت، سەرۆکی ئەنجوومەنی پارێزگاش بە پێکهاتەی عەرەب دەدرێت.

لێدوانی فەرمی: حەسەن مەجید، سەرۆکی فراکسیۆنی پارتی لە ئەنجوومەنی پارێزگای کەرکووک بە پەیامنێری ئاڤا نیوزی ڕاگەیاند: وەکو پارتی بە فەرمی بۆ ئەو کۆبوونەوەیە ئاگادار نەکراوینەتەوە لەسەر ئەوەی کۆبوونەوەی ئەنجوومەنی پارێزگای کەرکووک بكرێت، هیچ ڕێککەوتنێکیشمان لەگەڵ نەکراوە.