سبەی بەفەرمی هاتنی زیارەتکارانی ئێرانی دەستپێدەکات

ئاڤا نیوز 

ئەگەرچی چەند ڕۆژێکە زیارەتکاران لە ئێرانەوە بە دەروازەی حاجی ئۆمەران دێنە هەرێمی کوردستان، بەڵام بڕیارە بەشێوەی فەرمی بەیانی ڕۆژی یەکشەممە پرۆسەی هاتنی زیارەتکاران دەستپێبکات.

وێنە گەورەکە: ماوەی سێ ساڵە بە فەرمانی سەرۆکوەزیران بارزانی، هەموو ئامادەکارییەک دەکرێت بۆ پێشوازی لە زیارەتکارانی شیعەمەزهەبی ئێران، کە دەیانەوێت بچن بۆ کەربەلا.

لێدوانی فەرمی: هەژار حەکیم، بەڕێوەبەری ڕاگەیاندن و پەیوەندییەکانی ئیدارەی سەربەخۆی سۆران بە ئاڤا نیوزی گوت: دوو ساڵە ئامادەکارییەکان فراوانکراون، لە دەروازەی حاجی ئۆمەران تا بازگەی شێراوا چوار بنکەی پێشوازی دانراون، تەنیا لە حاجی ئۆمەران نۆ چادرگە دانراون، لە پێشانگەی نێودەوڵەتی هەولێریش شوێنی حەوانەوە دابین کراوە.

زانیاریی زیاتر: لەڕێگەی دەزگای خێرخوازی بارزانی خواردن و خواردنەوە بەخۆڕایی بۆ زیارەتکاران دابین کراوە، هاوکات پاسی گواستنەوە دابین کراوە، چاوەڕێ دەکرێت ئەمساڵ تا 100 هەزار زیارەتکار بە هەرێمی کوردستاندا تێپەڕن بۆ کەربەلا.

ئەوەی پێویستە بیزانیت: حکومەتی ئێران پارەی عێراقی بە نرخێکی کەم بۆ زیارەتکاران دابین کردووە، بۆنموونە لە بازاڕی دراو  40 هەزار تمەن بەرامبەر هەزار دیناری عێراقییە، بەڵام ئەو لیژنەیە هەر هەزار دینار بە 22 هەزار تمەن دەگۆڕێتەوە و 200 هەزار دینار بەو نرخە دەدات بە هەموو زیارەتکارێک ئەگەر تەمەنی لە پێنج ساڵ زیاتر بێت.