ڕێبوار تەها: بێ جیاوازی خزمەتی خەڵکی کەرکووک دەکەین

ئاڤا نیوز

 

ڕێبوار تەها، پارێزگاری هەڵبژێردراوی كەركووك ڕایدەگەیێنێ، لەمڕۆوە ڕۆژێكی نوێ لە پارێزگاکەی دەستپێدەكات و دەیانەوێت بێ جیاوازی خزمەتی هەمووان بکەن.

وێنە گەورەکە: دوای هەشت مانگ لە هەڵبژاردنی  ئەنجوومەنی پارێزگاکان، ئەمشەو لە بەغدا ئەنجوومەنی پارێزگای کەرکووک بە ئامادەبوونی نۆ ئەندام لە کۆی 16 ئەندام کۆبووەوە، تێیدا ڕێبوار تەها لە پشکی یەکێتی وەک پارێزگار و محەممەد حافز لە پێکهاتەی عەرەب وەک سەرۆکی  ئەنجوومەنی پارێزگا  هەڵبژێردران.

لێدوانی فەرمی: ڕێبوار تەها، پارێزگاری نوێی كەركووك لە پەیامێکدا پیرۆزبایی لە هاووڵاتیانی شاری كەركووك و سەرجەم پێكهاتەكان کرد. داواشی لە خەڵکی پارێزگاکە کرد هاوکاری بن بۆ ئەوەی حکومڕانییەکی خزمەتگوزار دابمەزرێنێت.

زانیاری زیاتر: ڕێبوار تەها دەڵێت: "لە ئەمڕۆوە سەردەمێکی نوێ لە کەرکووک دەستپێدەکات، کە سەردەمی پێکەوەژیان و خزمەتکردنی هەمووان دەبێت بەبێ جیاوازی، بۆیە داوا لە کۆمەڵانی خەڵکی کەرکووک دەکەم هاوکارمان بن بۆ ئەوەی حکومڕانییەکی ڕەشید بێتەئاراوە و ببێتە مایەی خزمەتی هەموو خەڵکی کەرکووک".