یەکەم هەڵوێستی بەرەی تورکمانی لەبارەی هەڵبژاردنی پارێزگاری کەرکووک

ئاڤا نیوز 

بەرەی تورکمانی ڕایگەیاند، هەڵبژاردنی پارێزگاری کەرکووک پێچەوانەی یاسا بووە و ئەوان بەرامبەر ئەو هەنگاوی شەوی ڕابردوو نراوە، بێدەنگ نابن.

وێنە گەورەکە: دوای هەشت مانگ لە هەڵبژاردنی  ئەنجوومەنی پارێزگاکان، شەوی ڕابردوو لە بەغدا ئەنجوومەنی پارێزگای کەرکووک بە ئامادەبوونی نۆ ئەندام لە کۆی 16 ئەندام کۆبووەوە، تێیدا پارێزگار و سەرۆکی  ئەنجوومەنی پارێزگای هەڵبژارد، دوو نوێنەرەکەی بەرەی تورکمانی، دوو نوێنەرەکەی پارتی و سێ ئەندامی پێکهاتەی عەرەبیش بایکۆتی کۆبوونەوەکەیان کرد.

لێدوانی فەرمی: محەمەد سەمعان، گوتەبێژی بەرەی تورکمانی بە ئاڤا نیوزی گوت."هەڵبژاردنی پارێزگاری کەرکووک پێشێلکردنی یاسا بوو، ئێمە بەرامبەر ئەو پێشێلکارییە بێدەنگ نابین".

ئەوەی پێشبینی دەکرێت: بەرەی تورکمانی دەیەوێت پاڵپشت بە ماددەی 13 لە یاسای هەڵبژاردنی ئەنجوومەنی پارێزگاکان، سکاڵایەک دژی کۆبوونەوەی هەڵبژاردنی پارێزگاری کەرکووک تۆماربکات، بەهۆکاری ئەوەی پرۆسەکە بەبێ بەشداری ئەوان کراوە کە پێکهاتەیەکی سەرەکی پارێزگای کەرکووکن، ماددەی 13ش دەڵێت، بڕیاردان لە کەرکووک دەبێت بە سازانی هەرسێ پێکهاتەکە بێت نەک بە زۆرینە.