دادگەى فیدراڵی سکاڵایەک دژی فرەژنى لە هەرێمى کوردستان ڕەتدەکاتەوە

ئاڤا نیوز 

 

دادگەی فیدراڵی سکاڵاىەکی دژی مەرجەکانى فرەژنى لە هەرێمى کوردستان ڕەتکردەوە، پارێزەرێکی کەیسەکەش دەڵێت جارێکى دیکە سکاڵا تۆمار دەکەنەوە.

 

چیرۆکی سەرەکی: سێ پارێزەر لە دادگەی باڵای فیدراڵیی عێراق سکاڵایان دژی ماددەی یەکەمی هەمواری یاسای باری کەسێتی ژمارە (15)ی ساڵی(2008)ی پەرلەمانی کوردستان تۆمارکردبوو کە تایبەتە بە مەرجەکانی فرەژنی لە هەرێمی کوردستان، بەڵام سکڵاکە ئەمڕۆ دووشەممە ڕەتکرایەوە.

 

لێدوانی فەرمی: موحسین هەرتەلی، یەکێک لە پارێزەرەکانی کەیسەکە بە ئاڤا نیوزی گوت، هۆکاری ڕەتکردنەوەی سکاڵاکە لەلایەن دادگەى فیدراڵی ئەوە بووە کە سکاڵاکارەکان زەرەرمەند نەبوون لەو کەیسەدا. 

زانیاریی زیاتر: سکاڵاکە دژ بە سەرۆکی پەرلەمانی کوردستان پێشکەش کرابوو. بەپێی قسەی پارێزەرەکە، ئەوان جارێکى دیکە لە دادگەی فیدراڵی سکاڵاکە لەسەر بنەماى داواى زەرەرمەندێک پێشکەش دەکەنەوە.

ئەوەی پێویستە بیزانیت: سكاڵاكاران داوایان کردبوو، دادگەی فیدراڵی ماددەی یەکەمی یاساکە بە نادەستووری دابنێت، هەمواری یاسای باری کەسێتی عێراقە و دوو مەرجی ئەو یاسایەی بۆ فرەژنی ڕاگرتووە، لەبری ئەوە حەوت مەرجی داناوە، مەرجەکانیش هێنانی ژنی  دووەم زۆر قورس دەکات.