ژمارەیەکی گوند و کۆمەڵگەی نیشتەجێبوونی کورد دەخرێنەوە سەر کەرکووک

ئاڤا نیوز

وەزارەتی پلاندانانی عێراق گۆڕانکاری جوگرافی لە پێنج ناحیەی پارێزگای کەرکووکدا کرد، بەگوێرەی بڕیارەکەش ژمارەیەکی گوند و کۆمەڵگەی نیشتەجێبوونی کوردنشین دەخرێنەوە سەر پارێزگاکە.

وێنە گەورەکە: ڕۆژی 14ی ئاب محەممەد تەمیم، وەزیری پلاندانانی عێراق نەخشەی نوێی ناحیەکانی قەرەهەنجیر، شوان، مولتەقا، یایچی و پردێی لە سنووی پارێزگای کەرکووک پەسەندکرد و ڕایگەیاند، بڕیارەکە کاریگەری لەسەر باشترکردنی ئاستی خزمەتگوزارییەکان لەو ناوچانەدا دەبێت.

لێدوانی فەرمی: ئاڤێستا محەممەد، بەڕێوەبەری ناحیەی قەرەهەنجیر بە ئاڤا نیوزی گوت، ماوەی چەند ساڵێکە کار لەسەر ئەوە دەکەن ژمارەیەک گوند و کۆمەڵگەی نیشتەجبوون بخرێنەوە سنووری پارێزگاری کەرکووک، تا ئەوانیش لە پڕۆژە خزمەتگوزارییەکانی بودجەی پەرەپێدانی پارێزگاکان سوودمەندبن، بۆیە بڕیارەکە کاریگەری باشی لەسەر زیاتر خزمەتکردنی هاووڵاتیانی سنوورەکە دەبێت.

بۆچی گرنگە: گەڕاندنەوەی ئەو گوند و ناوچانە بۆ سەر کەرکووک لەلایەک کاریگەری لەسەر بەرزکردنەوەی ڕێژەی کورد لە پارێزگاکەدا دەبێت، بەهۆی ئەوەی پێشتر ئەو ناوچانە لە دەنگدان لە سنووری پارێزگاکە بێبەش کرابوون، لەلایەکی دیکەشەوە لەسەر بودجەی کەرکووک پڕۆژەی خزمەتگوزاری بۆ ئەو ناوچانە دابین دەکرێت.

باکگراوند: حیزبی بەعس لە ساڵانی سەرەتای دەستبەکاربوونیدا قەزاکانی چەمچەماڵ و کفری و خورماتووی لە پارێزگای کەرکوک دابڕی و، بەسەر پارێزگاکانی سلێمانی و دیالە و سەڵاحەدین دابەشی کردن. لایەنە کوردییەکانیش ئەو هەنگاوە بە هەوڵێک بۆ زیادکردنی عەرەب و بەکەمینەکردنی کورد لە پارێزگاکەدا ناودەبەن، بۆیە لە چوارچێوەی ماددەی 140دا هەوڵی ئاساییکردنەوەی دۆخی دیمۆگرافی ئەو ناوچانە دەدەن.