ئاڤا بەدواداچوون بۆ هێرشكردنە سەر شوێنە کوردییەکان لە بەریتانیا دەكات

ئاڤا نیوز  

پەیامنێری ئاڤا میدیا لەشاری Hullی بەریتانیا، سەردانی ئەو شوێنانە دەکات کە لەلایەن خۆپیشاندەرە ڕاستڕەوەکان پەلامار دراون.

وێنە گەورەکە: دوو هەفتەیە لە چەند شارێکی بەریتانیا شوێنەکانی مانەوەی کۆچبەران کەوتوونەتە بەر هێرشی ڕاستڕەوە تووندڕەوەکان، دوای ئەوەی هێرش بۆ سەر ناوەندێکی فێرکردنی سەما لەلایەن گەنجێکی کۆچبەرەوە ڕوویدا و چەند کەسێکی کوشت و چەند کەسێکیشی بریندار کرد.

زانیاریی بەدەستهاتوو: کوردستان حەسەن، پەیامنێری ئاڤا نیوز لە شاری Hull دەڵێت: ئەم شارە بووەتە سەکۆی هێرشی خۆپیشاندەران، لەم چەند ڕۆژەدا خۆپیشاندەرە ڕاستڕەوە تووندڕەوەکان ‌هێرشیان کردووەتە سەر هۆتێلێکی شوێنی مانەوەی کۆچبەران، هاوکات هێرشیان کردووەتە سەر دووکانێکی چاکردنەوەی ئۆتۆمبێل و چوار کوردیان بریندار کردووەو نۆ ئۆتۆمبێلیان سووتاندووە.

لێدوانی فەرمی: داڤان یەحیا، نوێنەری ڕەوەندی کوردی لە شاری هۆڵ بە ئاڤا نیوزی گوت: ئەم شارە حەوزی سەرەکی "ڕەگەزپەرستەکان"ە، خۆپیشاندەران پەنجەرەکانی گەورەترین هوتێلی ئەم شارەیان شکاندووە، ئەگەرچی پۆلیس دەڵێت، ژیان ئاسایی بووەتەوە، بەڵام ئاسایی نەبووەتەوە.

ئەوەی پێویستە بیزانیت: تا ئێستا هەزار و 500 کەس لە ڕاستڕەوە تووندڕەوەکان لە بەریتانیا دەستگیرکراون.