دادگای فیدراڵی لەبارەی یاساییبوونی ئیدارەی نوێی کەرکووک کۆدەبێتەوە

ئاڤا نیوز

دادگای فیدراڵی بڕیاری دا ڕۆژی چوارشەممە سکاڵای بەرەی تورکمانی لەبارەی یاساییبوونی کۆبوونەوەی ئەنجوومەنی پارێزگای کەرکووک تاوتوێ بکات.

وێنە گەورەکە: 14ی ئەم مانگە بەرەی تورکمانی دژی پێکهێنانی ئیدارەی کەرکووک بەبێ بەشداری پێکهاتەی تورکمان، لە دادگای فیدراڵی سکاڵای تۆمار کرد.

 

لێدوانی فەرمی: محەممەد سەمعان، گوتەبێژی بەرەی تورکمانی بە ئاڤا نیوزی گوت، "دادگای فیدڕاڵی ڕۆژی چوارشەممەی داهاتووی بۆ پێداچوونەوە بەو سکاڵایە دیاری کردووە کە دژی یاساییبوونی کۆبوونەوەی ئەنجوومەنی پارێزگای کەرکووک تۆمارمان کردبوو".

شێوازی جێبەجێکردن: بەگوێرەی یاسای ئەنجوومەنی پارێزگاکانی عێراق، پێویستە لە بەڕێوەبردنی پارێزگای کەرکووک بە سازانی هەرسێ پێکهاتەی کورد و تورکمان و عەرەب بڕیار بدرێت، بەرەی تورکمانی پێیوایە پەراوێزخستنیان لە ئیدارەی نوێی کەرکووک، پێچەوانەی ماددەی 13ی ئەو یاسایەیە.