وەزارەتی تەندروستی ڕێکاری خۆپارێزی بۆ ڕێگرتن لە ئاوڵەی مەیموون دەگرێتەبەر

ئاڤا نیوز 

 

وەزارەتی تەندروستیی هەرێمی کوردستان ڕێکاری خۆپارێزی بۆ ڕێگریکردن لە بڵاوبوونەوەی نەخۆشیی ئاوڵەی مەیموون دەگرێتەبەر، وێڕای ئەوەی تاوەکو ئێستا هیچ تووشبوویەک بە نەخۆشییەکە لە هەرێمی کوردستان تۆمار نەکراوە. 

 

وێنەگەورەکە: نەخۆشیی ئاوڵەی مەیموون لە 25  وڵاتی جیهاندا بڵاوبووەتەوە و لەبارەی نەخۆشییەکەوە ڕێکخراوی تەندروستیی جیهانی هۆشداری داوە و باری لەناکاوی ڕاگەیاندووە. 

 

ڕاگەیێنراوی فەرمی: سامان بەرزنجی، وەزیری تەندروستیی لەگەڵ نوێنەری ڕێکخراوی تەندروستیی جیهانی و  لایەنە پەیوەندیدارەکان کۆبووەوە و بۆ بەرەنگاربوونەوە و خۆپارێزی لە نەخۆشیی ئاوڵەی مەیموون، وەزارەتی تەندروستی ئەم بڕیارانەی دەرکرد:

 

- بەیانی ڕێکارەکانی خۆپارێزی و ئامادەکاری لەلایەن وەزارەتی تەندروستییەوە بۆ دامودەزگاکانی تەندروستی ڕابگەیێنرێت.

 

- لیژنەیەکی باڵای هاوبەش لەنێوان وەزارەتی تەندروستی و وەزارەتی کشتوکاڵ پێکبهێنرێت. 

 

-پەیامەکانی تەندروستی بۆ هاووڵاتییان و گەشتیاران دابنرێت بۆ هۆشیاریی تەندروستی و هەڵمەتی ڕاگەیاندن و ڕۆشنبیریی تەندروستی.

 

 - ئامادەکاری دابینکردنی پشکنینی تاقیگەیی لەگەڵ ڕێکخراوی تەندروستیی جیهانی ئەنجام بدرێت و ئەنجامەی ڕابگەیێنرێت. 

 

ئەوەی پێویستە بیزانیت: نەخۆشیی ئاوڵەی مەیموون بەهۆی گازگرتن و چڕنووک گرتنی ئاژەڵێكی تووشبوو دەگوێزرێتەوە بۆ ئاژەڵی دیكە و لەوێشەوە بۆ مرۆڤ، یان لەڕێگەی تێكەڵبوون بەهۆی هەڵمژینی هەناسەی کەسی تووشبوو و بەكارهێنانی كەلوپەلەکانیان.