بلینکن: ڕێگری لە هەر هێرشێک دەکەین بکرێتە سەر ئیسرائیل

ئاڤا نیوز

وەزیری دەرەوەی ئەمریکا پەیامی پشتیوانی بۆ ئیسرائیل دووپاتدەکاتەوە و بەڵێن دەدات ڕێگری لە هەر هێرشێک بکەن بکرێتە سەری. لەبارەی گفتوگۆکانی ئیسرائیل و حەماسیش دەڵێت كۆتا دەرفەتە بۆ ئاگربەست و ڕزگاربوونی دیلەكان.

وێنە گەورەكە: نۆیەم جارە وەزیری دەرەوەی ئەمریكا لەبارەی شەڕی غەززە سەردانی ڕۆژهەڵاتی ناوەڕاست دەکات، ئامانجیشی ڕاگەیاندنی ئاگربەستە لەنێوان حەماس و ئیسرائیلدا. ئەمە لەکاتێکدایە بڕیارە ئەم هەفتەیە گەڕێکی دیکەی گفتوگۆ لە نێوان ئیسرائیل و حەماسدا لە قەتەر بكرێت.

 

لێدوانی فەرمی: ئەنتۆنی بلینکن، وەزیری دەرەوەی ئەمریکا، لە کۆنفرانسێکی ڕۆژنامەوانی هاوبەشدا لەگەڵ سەرۆکی ئیسرائیل لە تێلئەڤیڤ، لەبارەی ئەگەری هێرشی ئێران لە تۆڵەی کوژرانی  ئیسماعیل هەنیە ڕایگەیاند، هەوڵی یەکلاکەرەوەیان هەیە بۆ بڵاوەپێکردنی هێز و ڕێگریکردن لە هەر هێرشێک بۆ سەر ئیسرائیل.

لەلایەکی دیکەوە: لەبارەی گفتوگۆکانی حەماس  و ئیسرائیل بۆ  ڕاگەیاندنی ئاگربەست گوتی: "ئامانجمان ڕزگارکردنی دیلەکانە، دەبێت هەمووان ڕازی بن بەو ڕێککەوتنەی پێشنیارکراوە و ڕەتی نەکەنەوە. كاتی ئەوەهاتووە ئاگربەست بكەین و  ڕەنگە ئەمە دوا دەرفەت بێت  بۆ گەیشتن بەڕێككەوتن و ئازادكردنی دیلەكان".

بۆچونی لایەنی بەرامبەر: ئیسحاق هێرزۆگ، سەرۆکی ئیسرائیل گوتی: ”سوپاسی پشتیوانی ئەمریكا دەكەین بۆ وڵاتەكەمان، هیچ بابەتێك لەوە گرنگتر نییە دیلەكان بگەڕێنەوە، مافی خۆشمانە بەرگری لە خۆمان بكەین".