پارتی بەشداری لە كۆنگرەی دیموكراتەكانی ئەمریكا دەكات

ئاڤا نیوز 

 

ئەمڕۆ لە شیکاگۆ دیموکراتەکان گەورەترین کۆنگرە بۆ دیارکردنی سەرۆک دەبەستن و نوێنەری پارتی دیموکراتی کوردستانیش ئامادە دەبێت.

 

وێنە گەورەکە: لە شیکاگۆ بۆ ماوەی چوار ڕۆژ، کۆنگرەی دیموکراتەکان بەڕێوەدەچێت و لە سەرجەم وڵاتانی جیهانەوە میوان بانگهێشتی ئەمریکا کراون، کاتژمێر 05:00ـی ئێوارەی ئەمڕۆ بە کاتی ئەمریکا کۆنگرەکە بە گوتارێکی جۆ بایدن، سەرۆکی ئەمریکا دەستپێدەکات.

 

لێدوانی فەرمی: چنار سەعد عەبدوڵڵا، ئەندامی کۆمیتەی ناوەندیی پارتی بە نوێنەرایەتیی پارتی لە کۆنگرەکەدا بەشدارە، بە ئاڤا نیوزی ڕاگەیاند: بەشداریکردنی کورد لە کۆنگرەی دیموکراتەکان لەپاڵ نوێنەری حیزب و کەسایەتییە سیاسییە ناودارەکانی جیهان زۆر گرنگە، بانگهێشتکردنمان بەڵگەیە بۆ بایەخدان بە دۆزی کورد، ئێمە ئێستا لەنێو بازنە سیاسییە جیهانییەکەین، ئەم هەلە بۆ پتەوترکردنی پەیوەندییەکانیشمان دەقۆزینەوە.

 

زانیاریی زیاتر: چنار سەعد ڕاشیگەیاند: لە پەراوێزی کۆنگرەکەشدا ئێمە دیدارمان لەگەڵ سەرکردە سیاسییە بەشداربووەکانی جیهان دەبێت و هەلێکە بۆ ئەوەی گەنگەشەی دۆخی کورد لە ناوچەکە بکەین و لۆبی بۆ دۆزەکەمان بکەین، هاوکات لەگەڵ بەرپرسانی ئەمریکاش وەک دۆستێکی دێرینی کورد گفتوگۆمان دەبێت.

 

زانیاریی بەدەستهاتوو: جگە لە نوێنەری پارتی دیموکراتی کوردستان، لە هەرێمی کوردستان نوێنەری هەریەک لە یەکێتیی نیشتیمانی کوردستان و ڕەوتی هەڵوێستیش لە کۆنگرەکە بەشدارن .