پەرلەمانتارێک پەردە لەسەر تۆڕێکی سیخوڕی لەنێو نووسینگەی سەرۆکوەزیرانی عێراق هەڵدەداتەوە

ئاڤا نیوز

 

پەرلەمانتارێکی عێراق پەردە لەسەر تۆڕێکی سیخوڕی لە کۆشکی حکومی لە نووسینگەی سەرۆکوەزیران هەڵدەداتەوە و ئاماژە بەوە دەکات کاری ئەو تۆڕە گوێگرتن و سیخوڕی بووە بەسەر مۆبایلی پەرلەمانتاران و ناشرینکردنیان.

 

بڵاوکراوەی فەرمی: مستەفا سەنەد، پەرلەمانتاری عێراق لە پۆستێکی فەیسبووک ئاماژە بەوە دەکات ئەو تۆڕە لەلایەن دادگای لێکۆڵینەوەی کەرخ تایبەتمەند بە پرسەکانی تیرۆر دەستگیکراون و سەرۆکی تۆڕەکەش "محەممەد جوحی، جێگری بەڕێوەبەری گشتیی فەرمانگەی کارگێڕییە لە نووسینگەی سەرۆکوەزیران و بەرپرسی پەیوەندییەکان بووە لەگەڵ ئەندامانی پەرلەمان".

 

زانیاریی زیاتر: بەگوتەی سەنەد یەکێک لە قوربانییەکانی ئەو تۆڕە، خۆی بووە و ئاماژە بەوە دەکات، کاری تۆڕەکە گوێگرتن بووە لە پەیوەندییە تەلەفۆنییەکانی ئەندامانی پەرلەمان و سیاسەتمەداران، تۆڕەکە لە ڕێگەی ئاراستەکردنی سوپایەکی ئەلیکترۆنییەوە هەواڵی ساختەیان لەسەر ئەو کەسانە دروست کردووە.

 

ئەمەش بزانە: ئەو پەرلەمانتارە ئاماژە بۆ ئەوەش دەکات تۆڕەکە لە بەردەم دادگە دانیان بە کارەکانیان داناوە، لەنێویاندا دزەکردن بۆ نێو مۆبایلی سەعد بەزاز و ناردنی وێنەیەکی ساختە بەناوی کەناڵی شەرقیە کە وێنەی سەنەد، عودەی، محەممەد نووری و هەیسەم زەهوانی لەسەرە هەواڵی ناڕاستیان لەسەر داناوە و وێنەکەیان بۆ ژمارەی تایبەتی سەرجەم پەرلەمنتاران ناردووە.