دادگەی فیدراڵی سکاڵایەکی تورکمان لەبارەی ئیدارەی کەرکووک ڕەتدەکاتەوە

ئاڤا نیوز  

 
دادگەی فیدڕاڵی سکاڵایەکی سەرۆکی بەرەی تورکمانی ڕەتکردەوە بۆ دەرکردنی فەرمانێکی تایبەت بە پوچەڵکردنەوەی ئەنجامی کۆبوونەوەکەی ئەنجوومەنی پارێزگای کەرکووک و دەرەنجامەکانی.

وێنە گەورەکە: 14ی ئەم مانگە بەرەی تورکمانی دژی پێکهێنانی ئیدارەی کەرکووک سکاڵای تۆمارکرد، ئەوان دەڵێن، کۆبوونەوەکەی 10ی ئابی ئەنجوومەنی پارێزگای کەرکووک نایاسایی بووە، چونکە سەرۆکی بەتەمەنی ئەنجوومەن و شەش ئەندامی دیکەی لێ ئاگادار نەکراوەتەوە.

نووسراوی فەرمی: بەرەی تورکمانی لە سکاڵاکەدا داوای دەرکردنی فەرمانێکی سالاریشی کردبوو تا بڕیارەکانی ئەنجوومەنی پارێزگای کەرکووک بۆ هەڵبژاردنی پارێزگار و سەرۆکی ئەنجوومەنەکە ڕابگیرێن، دادگەی فیدڕاڵی لە وەڵامی ئەو داواکارییەدا ڕایگەیاند: "سکاڵاکە هیچ سیفەتێكی پەلە و پێویستی تێدا نییە، تا كاتی یەكلاییكردنەوەی سكاڵاكان بڕیاری دیكە دەردەچێت".

لە لایەکی دیکەوە: محەممەد سەمعان، گوتەبێژی بەرەی تورکمانی بە ئاڤا نیوزی گوت: دادگەی فیدڕاڵی سکاڵاکەیانی پەسەندکردووە، ڕۆژی چوارشەممەی داهاتووش پێداچوونەوە بەو سکاڵایە دەکات کە دژی یاساییبوونی کۆبوونەوەی ئەنجوومەنی پارێزگای کەرکووک تۆماریان کردووە.