لە شەو و ڕۆژێکدا 10 جار ناو بازاڕی هەولێر لە زبڵ و خاشاک پاک دەکرێتەوە

ئاڤا نیوز  

بەهۆی قەرەباڵغی و زۆری ژمارەی سەردانیکەرانی، ژینگەپارێزانی هەولێر لە شەو و ڕۆژێکدا 10 جار ناو بازاڕی شاری هەولێر پاک دەکەنەوە. 

وێنە گەورەکە: بازاڕی شاری هەولێر بەیەکێک لە گەورەترین بازاڕەکانی هەرێمی کوردستان دادەنرێت و ڕۆژانە جگە لە هاونیشتمانیانی ناوخۆ، ژمارەیەکی زۆر گەشتیار سەردانی دەکەن. 

لێدوانی فەرمی: ژیار جەلال، بەڕێوەبەری خزمەتگوزاری ژینگەپارێزی هەولێر بە ئاڤا نیوزی ڕاگەیاند: لەماوەی 24 کاتژمێردا، 18 کاتژمێر ژینگەپارێزان سەرقاڵی پاککردنەوەی بازاڕی هەولێرن و پێشووتر لە شەو و ڕۆژێکدا نۆ جار پاک دەکرایەوە، بەڵام ئەمساڵ زیادمان کردووە و هەموو ڕۆژێک 10 جار زبڵ و خاشاک هەڵدەگیرێتەوە. 

زانیاریی زیاتر: لەماوەی شەو و ڕۆژێکدا نزیکەی 50 تۆن زبڵ و خاشاک لەلایەن 55 ژینگەپارێزەوە بەتەنیا لەناو بازاڕی گشتی و بازاڕی شێخەڵا هەڵدەگیرێتەوە، هەموو بەیانییەکیش ناو بازاڕی شاری هەولێر دەشۆردرێت. ژیار جەلال وای گوت.

باکگراوند: لەشاری هەولێر ئەو زبڵ و خاشاکەی هەڵدەگیرێتەوە، دەبرێن بۆ زبڵخانەی کانی قرژاڵە کە ڕووبەرەکەی 300 دۆنمە و دەکەوێتە ڕۆژئاوای شاری هەولێر، لەوێ بەپرۆسەیەک ئەو زبڵە ژێر خاک دەنرێت و چارەسەر دەکرێت.