ئەمریکا مەرجێکی قورسی پووتین بۆ ئاگربەست ڕەتدەکاتەوە

ئاڤا نیوز

بەرپرسانی ئیدارەی بایدن پیشنیازێکی ڤلادمیر پووتین، سەرۆکی ڕووسیایان ڕەتکردووەتەوە لەبارەی ڕاگەیاندنی ئاگربەست لە ئۆکراینا بەهۆی ئەوەی نایانەوێت ئاگربەستێک بکرێت کە قسەی ئۆکراینای تێدا نەبێت.

بۆچی گرنگە: ماوەی دوو ساڵ زیاترە جەنگی ڕووسیا-ئۆکراینا بەردەوامە و ئەمە یەکەم جارە وردەکاری ئاگربەستێکی لەو جۆرە و پەیوەندیکردنی ڕووسیا بە ئەمریکاوە بڵاودەکرێتەوە.

ئەوەی پێویستە بیزانیت: ئاژانسی ڕۆیتەرز لە زاری سێ سەرچاوەی ڕووسی ئاشکرایکردووە، لەساڵی 2023 ڤلادمیر پووتین لە ڕێی کۆمەڵێک وڵاتانی نێوەندگیری ڕۆژهەڵاتی ناوەڕاست ئەوەی بە ئەمریکا ڕاگەیاندووە کە ئامادەی ئاگربەستە.

زانیاری زیاتر: بەپێی گوتەی سەرچاوەکان، پووتین ئامادە بووە جەنگ کۆتایی پێ بهێنیت، بەڵام بەبێ ئەوەی دەستبەرداری ئەو ناوچانە ببێت کە لە ئۆکراینا دەستی بەسەردا گرتووە.

هۆکارە زانراوەکان: یەکێک لە سەرچاوەکان باسی لەوە کردووە، واشنتن ئەوەی بە مۆسکۆ گوتووە، گفتوگۆ لەسەر ئاگربەستێک ناکەن گوتەی ئۆکراینا لەبەرچاو نەگیرێت، بۆیە پەیوەندییەکان لەنێوانیان کۆتایی هاتووە.

لێدوانی لایەنی بەرامبەر: ڤۆلۆدمیر زیلینسکی، سەرۆکی ئۆکراینا، پێشتر ڕایگەیاندووە هەرگیز قبوڵی ئەوە ناکات ڕووسیا دەست بەسەر خاکی وڵاتەکەیدا بگرێت. 

هاوکات، سەرچاوەیەکی ئەمریکی ئەوەی بە ڕۆیتەرز ڕاگەیاندووە، هیچ پەیوەندییەکی فەرمی لەنێوان واشنتن و مۆسکۆ نەبووە و ئیدارەی بایدن هەرگیز بەشداری دانوستانێک ناکات ئۆکراینا فەرامۆش بکرێت.