پەرلەمانی عێراق لەبارەی زیادکردنی هەشت تریلیۆن دینار لە خشتەی بودجە ڕوونکردنەوە دەدات

ئاڤا نیوز

 

سەرۆکایەتیی پەرلەمانی عێراق بە بەڵگە هەموو ئەو دەنگۆیانە ڕەتدەکاتەوە کە باس لە زیادکردنی هەشت تریلیۆن دینار بۆ خشتەی بودجە دەکرێت و ڕایدەگەیێنێت، هەمان ئەو خشتەی بۆ پەرلەمان هاتووە، هەمان خشتە بۆ ئەنجوومەنی وەزیران ڕەوانە کراوەتەوە.

 

وێنە گەورەکە: چەند ڕۆژێکە لە میدیا ناوخۆیی و تۆڕە کۆمەڵایەتییەکان باس لەوە دەکرێت بڕی هەشت تریلیۆن دینار خراوەتە سەر خشتەی بودجەی 2024 بەبێ ئەوەی وردەکاری خەرجکردنەکەی لەناو خشتەکەدا دیاری کرابێت.

 

ڕاگەیێنراوی فەرمی: موحسن مەندەلاوی، سەرۆکی ئەنجوومەنی نوێنەران بەوەکالەت ڕایگەیاند: خشتەیەی بودجە کە لەلایەن پەرلەمانەوە دەنگی لەسەر درا، هەمان ئەو خشتەیەیە کە لەلایەن ئەنجوومەنی وەزیرانەوە ڕەوانە کرابوو بۆشی ڕەوانکرایەوە بەبێ ئەوەی هیچ هەموارێکی تێدا بکرێت.

 

زانیاریی زیاتر: مەندەلاوی هۆشداری دا لەوەی "هەر لایەنێک هەوڵی چەواشەکردنی ڕای گشتی بدات لەڕێگەی شاردنەوەی ڕاستییەکان و باسکردنی ئەو بابەتە دوور لە ڕاستی بۆ بەدەستهێنانی مەبەستێکی سیاسی، ئەوا ڕووبەڕووی لێپێچینەوەی یاسایی دەکرێتەوە.

 

ئەوەی پێویستە بیزانیت: سەرۆکی ئەنجوومەنی نوێنەران بەوەکالەت ئەو دوو نووسراوەی خستووەتەڕوو کە پێش مانگێک بۆ ئەنجوومەنی وەزیرانی ناردووە تێیدا وەڵامی ئەنجوومەنی وەزیرانی داوەتەوە لەبارەی ئەوەی خشتەکە وەکو خۆی پەسندکراوە.