بۆ یەکەمجار ئەندازیارانی کورد ماستەرپلان بۆ کێشەی کارەبا دادەنێن

ئاڤا نیوز

وەزارەتی كارەبا بۆ یەکەمجار لەلایەن ئەندازیارانی کورد و لەڕێگەی ماستەرپلانێكی نوێوە هەوڵ دەدات کارەبای نیشتمانیی 24 كاتژمێری بۆ هاووڵاتیان دابین بكات.

وێنە گەورەكە: کارنامەی سەرەکی كابینەی نۆیەمی حكومەتی هەرێمی كوردستان پێشكەشكردنی زۆرترین خزمەتگوزارییە بۆ هاووڵاتیان، چارەسەرکردنی کێشەی کارەباش لەپێشینەی کارەکانە، بۆ ئەو مەبەستە وەزارەتی كارەبا پلانێكی درێژخایەنی داڕشتووە.

لێدوانی فەرمی: د. زانا میران، بەڕێوەبەری پلاندانان لە وەزارەتی كارەبا بە ئاڤا نیوزی گوت: "بۆ یەکەمجار لە مێژووی وەزارەتی کارەبا ماستەرپلانەکە لەلایەن ئەندازیارانی كوردەوە بەخۆڕایی داڕێژراوە و بۆ 10 ساڵە". پێشتر لەڕێگەی ئەندازیاری بیانی و كۆمپانیاكانەوە ماستەرپلان دادەنرا و تێچووەکی زۆری هەبوو.

بۆچی گرنگە: دابەشكردنی كارەبا ڕێكدەخرێتەوە، بەفیڕۆدان كەمدەکرێتەوە، بەرهەمهێنان زیاد دەکرێت و پلان ئەوەیە کارەبای نیشتمانی بکرێتە 24 كاتژمێری.

ئەوەی پێویستە بیزانیت: غازی زیاتر بۆ وێستگەكان دابین دەكرێت، غاز دەگەیێنرێتە ئەو وێستگانەی پێویستیان پێیەتی، هاوكات بەپێی بودجەی بەردەست وێستگەی لاوەكیش دروست دەكرێن.