پەرلەمانی عێراق هەمواری یاسای باری کەسێتی دەهێنێتەوە بەرباس

ئاڤا نیوز

سەرەڕای خۆپێشاندان و ناڕەزایی ڕێکخراوەکانی ژنان و بەشێک لە پەرلەمانتاران و یاساناسان، پەرلەمانی عێراق دوای چلەی ئیمامی حوسێن دووبارە هەمواری یاسای باری کەسێتی دەهێنێتەوە بەرباس.

وێنە گەورەکە: لە ئەنجوومەنی نوێنەرانی عێراقەوە هەوڵێک هەیە بۆ ئەوەی  یاسای باری کەسی ژمارە 188ـی ساڵی 1959 هەموار بکرێتەوە، لایەنە شیعەکان پشتگیری لە هەموارە نوێییەکە دەکەن، ئەوەش ناڕەزایی لێکەوتووەتەوە و لە چەندین پارێزگای عێراق خۆپێشاندانی لەدژ کراوە.

لێدوانی فەرمی: محەممەد خەفاجی، ئەندامی لیژنەی یاسایی لە پەرلەمانی عێراق بە ئاڤا نیوزی گوت، دوای خوێندنەوەی دووەم بۆ هەمواری یاسای باری کەسێتی، ڕەشنووسی پڕۆژەیاساکە ئاراستەی لیژنەکەی ئەوان دەکرێت، "لەو باوەڕەشدام سەرەڕای ناڕەزاییەکان، دوای پشووەکانی  چلەی ئیمامی حوسێن خوێندنەوەی دووەم بۆ ڕەشنووسی هەمواری یاساکە بکرێت".

کاریگەری و لێکەوتەکان: ڕەشنووسی هەمواری یاسای باری کەسێتی ڕووبەڕووی ناڕەزایی فراوانی بەشێک لە ژنان، پەرلەمانتاران، یاساناسان و سیاسەتمەداران بووەتەوە و وەک هەوڵێک بۆ بەشوودانی کچان لە تەمەنێکی کەمەوە ناوی دەبەن، هەمواری یاساکەش بە ستەمکردن بەرامبەر ژنان لەلایەن پیاوانەوە لەقەڵەم دەدەن.