گۆڕان ڕێکخەری گشتی هەڵدەبژێرێ و ئاڤا ناوەکەی ئاشكرا دەکات

ئاڤا نیوز

بزووتنەوەی گۆڕان پێش هەڵبژاردنی خولی شەشەمی پەرلەمانی کوردستان ئەندامانی خانەی ڕاپەڕاندن و ڕێکخەری گشتی هەڵدەبژێرێت، ئاڤا نیوز زانیویەتی دانا ئەحمەد مەجید، پارێزگاری پێشووتری سلێمانی دەبێتە ڕێکخەر.

 

وێنە گەورەکە: سەرەتای ئەمساڵ بزووتنەوەی گۆڕان دووەمین کۆنفرانسی ناوخۆیی سازکرد و 32 باژێڕوانی وەک ئەندامی جڤاتی نیشتمانی هەڵبژارد، بەڵام ئەندامانی خانەی ڕاپەڕاندن و ڕێکخەری گشتی هەڵنەبژێردران.

لێدوانی فەرمی: دلێر حوسێن، ئەندامی جڤاتی نیشتمانیی بزووتنەوەی گۆڕان بە ئاڤا نیوزی گوت، "بەر لە هەڵبژاردن پێویستمان بە نوێکردنەوەی ئۆرگانەکان هەیە، چاوەڕوان دەکرێت پێش هەڵبژاردن کارەکانی کۆنفرانسی دووەم تەواو بکرێن."

 

زانیاریی تایبەت: ئەندامانی جڤاتی نیشتمانی خانەی ڕاپەڕاندن و ڕێکخەری گشتی هەڵدەبژێرن، ئاڤا زانیویەتی دانا ئەحمەد مەجید کە دۆستێکی نزیکی نەوشیروان مستەفا بوو، زۆرترین پاڵپشتی هەیە،  هەردوو باڵە سەرەکییەکەی نێو گۆڕان (باڵی کوڕانی نەوشیروان مستەفا و باڵی عومەری سەید عەلی) لەسەری کۆکن و دەبێت بە سێیەمین  ڕێکخەری بزووتنەوەکە.

ئەمەش بزانە: دوای زیاتر لە 10 ساڵ، مانگێک پێش ئێستا دانا ئەحمەد مەجید لە ئەوروپا گەڕاوەتەوە سلێمانی، بۆ ئەوەی ئامادەکاری بکات بۆ وەرگرتنی پۆستەکە.

لەلایەکی دیکەوە: سەرچاوەیەکی باڵا لەنێو بزووتنەوەی گۆڕان بە ئاڤا نیوزی گوت: "تاوەکو ئێستا هیچ کەسێک بەفەرمی بۆ پۆستی ڕێکخەری گشتی خۆی بەربژێر نەکردووە، تاوەکو ئێستاش کات بۆ کۆبوونەوەی جڤاتی نیشتمانی دیاری نەکراوە، هەر کاتێک کاتی کۆبوونەوەکە دیاری کرا، 10 ڕۆژ پێشتر دەرگای خۆپاڵاوتن دەکرێتەوە".