سوودانی سەرکەوتنی چلەی ئیمام حوسێنی ڕاگەیاند

ئاڤا نیوز 

سەرۆکوەزیرانی عێراق سەرکەوتنی پلانی زیارەتی چلەی ئیمام حوسێنی ڕاگەیاند و هەوڵەکانی سەرجەم دەزگا ئەمنی و خزمەتگوزارییەکانی بەرزنرخاند، هاوکات بڕیاری جێبەجێکردنی 37 پرۆژەی بۆ خزمەتکردنی زیارەتکاران دا.

وێنە گەورەکە: ساڵانە بەبۆنەی چلەی شەهیدکردنی ئیمام حوسێن ملیۆنان زیارەتکاری عێراقی و بیانی سەردانی مەزارگەی ئیمام حوسێن لە شاری کەربەلا و مەزارگەی ئیمامی عەلی لە شاری نەجەف دەکەن. بۆ ئەو مەبەستەش سەرجەم دامودەزگا ئەمنی و خزمەتگوزارییەکانی عێراق بەتەواوی دەکەونە حاڵەتی ئامادەباشییەوە.

لێدوانی فەرمی: محەممەد شیاع سوودانی، سەرۆکوەزیرانی عێراق لەگەڵ تەواوبوونی ڕێوڕەسمەکانی چلە لە کەربەلا، لە کۆنگرەیەکی ڕۆژنامەوانیدا سەرکەوتنی پرۆسەکەی ڕاگەیاند و هەوڵەکانی سەرجەم دەزگا ئەمنی و خزمەتگوزارییەکانی بەرز نرخاند.

لەلایەکی دیکە: بەمەبەستی دامەزراندنی ژێرخانێکی پتەو کە لەڕێگەیەوە ئاسانکاری بۆ زیارەتکاران بکات، سوودانی 37 پڕۆژەی خزمەتگوزاری جۆراوجۆری ڕاگەیاند و زیاتر لە سێ تریلیۆن و 500 ملیار دیناری عێراقی بۆ تەرخان دەکرێت.

زانیاریی زیاتر: پرۆژەکان بریتین لە دروستکردن و نۆژەنکردنەوەی ڕێگای بازنەیی، چوارڕیان، پرد، پردی پیادە، گۆڕەپانەکان، دامەزراندنی پرۆژەی ئاو، شاری زیارەتکاران و کۆمەڵگەی خزمەتگوزاری و، لە هەفتەکانی داهاتووەوە دەست بە جێبەجێکردنیان دەکرێت.