بە بڕیاری سەرۆکوەزیران بارزانی وانەبێژان دەکرێنە گرێبەست

ئاڤا نیوز

 

سەرۆکوەزیران بارزانی بەئامادەبوونی وەزیری پەروەردە لەگەڵ نوێنەرانی مامۆستایانی وانەبێژان کۆبووەوە و بڕیاری دا مامۆستایانی وانەبێژ بکرێنە گريبەست.

 

ڕاگەیێنراوی فەرمی: سەرۆکوەزیران بارزانی لە کۆبوونەوەی لەگەڵ نوێنەرانی مامۆستایانی وانەبێژ بڕیاری دا لەسەر داهاتی ناوخۆی حکومەت هەرێمی کوردستان، سەرجەم وانەبێژان کە ژمارەیان نزیکەی 38 هەزار کەس دەبێت بکرێنە گرێبەست.

 

زانیاریی زیاتر: سەرۆکوەزیران بارزانی ڕایگەیاند: بە شێوەیەکی دادپەروەرانە مامەڵە لەگەڵ هەرێمی کوردستان ناکرێت، هەر بۆ نموونە لە ئاستی حکومەتی فیدراڵدا، لە پارێزگاکانی دیکەی عێراقدا، تەنیا لە ماوەی ساڵێکدا، نزیکەی یەک ملیۆن کەس دامەزراون، بەڵام تەنانەت یەک کەسیان بۆ هەرێمی کوردستان دانەمەزراندووە.

 

گۆشەیەکی دیکەی بابەتەکە: سەرۆکوەزیران بارزانی سوپاسی مامۆستایان و وانەبێژانی کرد کە سەرەڕای دۆخی سەختی دارایی، کۆڵیان نەداوە و درێژەیان بە ئەرک و پەیامی پیرۆزی خۆیان داوە و بەرپرسیاریەتی خۆیان بەجێگەیاندووە.

 

لەلایەکی دیکەوە: ئالان حەمەسەعید، وەزیری پەروەردەی حکومەتی هەرێمی کوردستان لە کۆنگرەیەکی ڕۆژنامەنووسیدا گوتی: سەرۆکوەزیران بارزانی وەزارەتی پەروەردەی ڕاسپارد بەزووترین کات دەست بە ڕێکارەکان بۆ پرۆسەی بە گرێبەستکردن بکەن، هەر لە سبەیەوە دەست بە هەنگاوەکان دەکەن.