فەرمانی دەستگیرکردن بۆ دوو تۆمەتباری "دزیی سەدە" دەرکرا

ئاڤا نیوز  

دادگای ناوەندیی بەرەنگاربوونەوەی گەندەڵی لە بەغدا، فەرمانی دەستگیرکردنی بۆ نوور زوهێر و هەیسەم جبووری، تۆمەتبارانی سەرەکیی دۆسیەی "دزیی سەدە"  دەرکرد. مۆڵەتی دوو هەفتەش بە کەفیلەکانی نوور زوهێر دەدات ڕادەستی بکەن.

چیرۆکی سەرەکی:  14ی ئەم مانگە نوور زوهێر لە دادگا ئامادەنەبوو، لەسەر داوای پارێزەکەیشی دانیشتنەکە بۆ ئەمڕۆ دواخرا، دادگای ناوەندیی بەرەنگاربوونەوەی گەندەڵیش لە بەغدا ئەمڕۆ بڕیاری دەستگیرکردنی بۆ  ناوبرا و تۆمەتبارێکی دیکە دەرکرد.

لێدوانی فەرمی: مستەفا سەنەد، ئەندامی لیژنەی دارایی پەرلەمانی عێراق، دوای پرۆسەی دادگاییکردنەکە لە پەیامێکی ڤیدیۆییدا ڕایگەیاند: "ئێستا لە دادگای ناوەندیی بەرەنگاربوونەوەی گەندەڵی دەرچووین، سوپاس و ستایش بۆ خودا دادوەری پاڵەوان خالید سەددام فەرمانی دەستگیکردنی بۆ تۆمەتبار نوور زوهێر دەرکرد و مۆڵەتی دا بە کەفیلەکانی تاوەکو 9-9ی ئەمساڵ لەبەردەم دادگا ئامادەی بکەن".

لەلایەکی دیکەوە: دادگای ناوەندیی بەرەنگاربوونەوەی گەندەڵی لە بەغدا بڕیاری دەستگیرکردنی بۆ هەیسەم جبووری، یەکێکی دیکە لە تاوانبارانی دۆسیەی "دزیی سەدە" دەرکرد.

ئەوەی پێویستە بیزانیت: ڕۆژی شەممە، 24ی ئەم مانگە نوور زوهێر، تۆمەتباری سەرەکی "دزیی سەدە" و بازرگانی عێراق,ی  بەهۆی ڕووداوێکی هاتووچۆی گوماناوییەوە لە بەیروتی پایتەخی لوبنان بە سەختی بریندار بوو.

ئەمەش بزانە: پێش برینداربوونی، نوور زوهێر لە دیمانەیەکی تەلەڤزیۆنیدا ئامادەیی خۆی نیشاندابوو لە دانیشتنی ئەمڕۆدا لەبەردەم دادگا ئامادەبێت و  ئەوەشی گوتبوو "زۆر شت ئاشكرا دەكات ئەگەر بێت و دادگەییکردنەکە بەشێوەیەكی ئاشكرا بکرێت".