لیژنەیەکی باڵای ئەمنی تایبەت بە هەڵبژاردن پێکدەهێنرێت

ئاڤا نیوز

لیژنەیەکی باڵای ئەمنی بەسەرۆکایەتیی ڕێبەر ئەحمەد، وەزیری ناوخۆ بۆ سەرپەرشتیکردنی هەڵبژاردنی پەرلەمانی كوردستان پێکدەهێنرێت.

 
چیرۆکی سەرەکی: لیژنەکە لە 22 ئەندام پێکهاتووە و کاتژمێر 2:30ـی خولەکی ئەمڕۆ سێشەممە یەکەم کۆبوونەوەی دەکات، بەمەبەستی ئامادەکاری و گرتنەبەری ڕێوشوێنی ئەمنی بۆ پارێزگاریکردن و سەرپەرشتیکردنی هەڵبژاردنی خولی شەشەمی پەرلەمانی کوردستان.

 

نووسراوی فەرمی: ئەندامانی لیژنەکە پێکدێن لە: پارێزگارەکانی هەولێر، سلێمانی، دهۆک و هەڵەبجە، سەرپەرشتیاری ئیدارە سەربەخۆکانی گەرمیان، ڕاپەڕین، سۆران و زاخۆ، لەگەڵ نوێنەری کۆمیسیۆن، سەرۆکی دەزگای ئاسایش، ئاسایشی هەولێر، فەرماندەیی زێرەڤانی، فەرماندەیی بەرگری و فریاکەوتن، بەڕێوەبەرانی گشتی پۆلیس، بەرگری شارستانی  و ڕەگەزنامە، بەرپرسی دەستەی هەڵبژاردنەکان، بەرپرسی  هەماهەنگی ئەمنیی دەستەی هەڵبژاردنەکان، بەڕێوەبەری گشتیی پۆلیسی هەرێم و نوێنەری دیوانی وەزارەتی ناوخۆ.

هۆکارە زانراوەکان: ئەرکی سەرەکی لیژنەکە ڕێکخستن و کۆنترۆڵکردنی بانگەشە و کۆبوونەوە جەماوەرییەکان، پاراستنی بنکە و سندووقەکانی دەنگدان، پاراستنی ئەمنییەتی دەنگدەران و کارمەندانی کۆمیسیۆن و گواستنەوەی سندووقەکانی دەنگدانە.

باکگراوند: بڕیارە لە 20-10-2024 هەڵبژاردنی خولی شەشەمی پەرلەمانی کوردستان بکرێت، لە ئێستاوە ئامادەکارییەکان بۆ ئەو مەبەسەتە دەستیپێکردووە.