پەنابەرێكی عێراقی هەوڵی كوشتنی سەرۆكی پێشووتری ئەمریكا دەدات

ئاڤا دیجیتاڵ

دادگایەكی ئەمریكا سزای زیاتر لە 14 ساڵ زیندانیی سەپاند بەسەر پەنابەرێكی عێراقییدا، دوای ئەوەی ئاشكرابوو هەوڵی داوە لە ڕێگەی تیمێكی داعشەوە جۆرج دەبلیو بووش سەرۆكی پێشووتری ئەمریكا بكوژێت. 

چیرۆكی سەرەكیی: شەهاب ئەحمەد شەهاب تۆمەتی ئەوەی خستووەتە پاڵ سەرۆكی پێشووتری ئەمریكا ئەو پشێویەی ئێستا لە عێراق هەیە، بەهۆی هێرشی ئەمریكاوە بووە لە ساڵی 2003 بۆ سەر وڵاتەكە كە ئەوكات بووش سەرۆكی ئەمریكا بوو.

زانیاری بەدەستهاتوو: دادوەر مایكڵ واتسۆن سزای 178 مانگ زیندانیكردنی بەسەر شەهابدا سەپاند، دوای ئەوەی دانی ناوە بەوەی بۆ ئەنجامدانی كردەوەكەی ویستوویەتی پارە بدات بە تیرۆریستان.

زانیاريی زیاتر: دادوەر فەرمانیداوە دوای ئازادكردنیشی 15 ساڵ چاودێری بكرێت، ڕەنگە دوای كۆتایی هاتنی وادی زیندانیكردنەوەی دیپۆرت بكرێتەوە. رۆژنامەی واشنتن تایمز ئەمەی بڵاوكردووەتەوە.

ئەوەی لەوبارەیەوە دەگوترێت: بەرپرسانی ئەمریكا بە سی ئێن ئێنیان گوتووە، شەهاب لە باڵیۆزخانەی ئەمریكا لە عێراق لەلایەن بەرپرسێكی گەندەڵەوە ڤیزای پیدراوەو چووەتە ئەمریكا، هەر كە چووەتە ئەمریكا داوای مافی پەنابەری كردووەو هەوڵیداوە چیرۆكی هاوسەرگیریی درۆ بۆ كەیسەكەی زیاد بكات، بەڵگەنامەی ساختەی جیابوونەوەی لە هاوژینەكەی لەعێراق بەدەستهێناوە بۆ ئەوەی بەڵگەنامەی هاوسەرگیری وەهمیی پێشكەش بكات.