ئیسرائیل: بە دەوڵەتی فەڵەستین ڕازی نابین

ئاڤا نیوز 

 

سێ وەزیری حكومەتی ئیسرائیل لەبارەی ئاڵۆزییەكانی نێوان وڵاتەكەیان و گرووپە چەكدارەكان قسەیان كردووە و دەڵێن "ڕازی نین فەڵەستین دەوڵەتی هەبێت".

 

ئەوەی ئێستا ڕوودەدات: هەریەکە لە وەزیری دارایی، وەزیری ئاسایشی نیشتمانی و وەزیری ڕاگەیاندن و ڕەوەندی ئیسرائیلی، سەرلەبەیانیی ڕۆژی 15-2-2024 لە سێ بۆنەی جیاوازدا ڕایانگەیاند: "بە بوونی دەوڵەتی فەڵەستین ڕازی نابن"

 

لێدوانە فەرمییەكان:

بێزالێل سمۆتریچ، وەزیری دارایی ئیسرائیل: "بە پلانی ئەمریكا بۆ دروستكردنی دەوڵەتی فەڵەستین ڕازی نین".

ئیتامار بن گڤیر، وەزیری ئاسایشی نیشتمانیی ئیسرائیل: "پێشنیازی ئەمریکا بۆ دامەزراندنی دەوڵەتی فەلەستینی ڕەتدەكەینەوە".

عەمیحای شیکلی، وەزیری ڕاگەیاندن و ڕەوەندی ئیسرائیلی: "ڕێککەوتنی ئۆسلۆ بۆ ئاشتی ڕەتدەکەینەوە و بە پێشنیازی ئەمریکا بۆ دروستکردنی دەوڵەتی فەڵەستین ڕازی نین".

باکگراوند: لەدوای سەرهەڵدانی جەنگی غەززە و بەمەبەستی کۆتاییهاتنی شەڕ و ناکۆکییەکان، ئەمریکا و نەتەوەیەکگرتووەکان و چەند وڵاتێک پێشنیازی "دامەزراندنی دوو دەوڵەت"یان بۆ فەڵەستین و ئیسرائیل خستووەتەڕوو.