بەها ئەعرەجی: ئەوەی دژی سوودانی دەکرێت نمایشە

ئاڤا نیوز 

جێگری پێشووتری سەرۆکوەزیرانی عێراق، چوارچێوەی هەماهەنگی تۆمەتبار دەکات بەوەی گوشاری میدیایی لە محەممەد شیاع سوودانی دەکات و پێشبینیش دەکات پارتی و سەدر و سوودانی و ڕەنگە مالیکیش لەهاوپەیمانییەکدا کۆببنەوە.

 

وێنە گەورەکە: بەشێک لە هێزەکانی چوارچێوەی هەماهەنگی ناکۆکییانە لەگەڵ محەممەد شیاع سوودانی هەیە و زۆرجار هێرشی میدیاییان کردووەتە سەر، بەڵام بەگوتەی بەها ئەعرەجی ئەو هێرشە میدیاییانە نمایشە بۆ ئەوەی لەهەڵبژاردنی داهاتوودا بگەڕێتەوە نێو چوارچێوەی هەماهەنگی.

 

ڕاگەیێنراوی فەرمی: بەها ئەعرەجی، جێگری پێشووتری سەرۆکوەزیرانی عێراق لە چاوپێکەوتنێکی تەلەڤزیۆنی ڕایگەیاند: ئەگەر چوارچێوەی هەماهەنگی واز لە سوودانی بهێنێت ئەوا بەدوای هاوپەیماندا دەگەڕێت، پارتی و ڕەوتی نیشتمانی شیعە بەسەرۆکایەتی موقتەدا سەدر نزیکن بۆ ئەو هاوپەیمانییە و لەوانەیە نوری مالیکیش بچێتە پاڵیان.

 

زانیاریی زیاتر: بەگوتەی بەها ئەعرەجی هەندێک لە ناکۆکییەکانی نێوانیان کۆنن و لەگەڵ نزیکبوونەوەی هەڵبژاردن دەرکەوتوونەتەوە و پێیان وابوو کە سوودانی کەسێکی ئاساییە و  دەتوانرێت وەک بەڕێوبەرێکی گشتی بێت بۆیان، بەڵام ئەوەی قبوڵ نییە و بووە یەکێک لە سەرکردە سیاسییەکان.