ئەمساڵ زیاتر لە هەزار تۆمەتباری ماددەی هۆشبەر دەستگیرکراون

ئاڤا نیوز

ئاماری بەڕێوەبەرایەتیی نەهێشتنی ماددە هۆشبەرەکان دەریدەخات، تەنیا لە حەوت مانگی ئەمساڵ زیاتر لە هەزار تۆمەتباری ماددە هۆشبەرەکان دەستگیرکراون، زۆرترین ماددەی دەستبەسەر داگیراویش "کریستاڵ" بووە.

وێنە گەورەکە: چەند ساڵێکە ئاماری دەستگیرکردنی بازرگانان و بەکارهێنانی ماددەی هۆشبەر لە هەرێمی کوردستان زیادی کردووە، لێکۆڵەرانی ئەو بوارە دەڵێن، هۆکاری سەرەکی زۆری بەرهەمهێنانیەتی لە ئێران و سووریا. 

لێدوانی فەرمی: نەقیب ئەرکان بیبانی، ئەفسەری بەڕێوەبەرایەتی نەهێشتنی ماددە هۆشبەرەکان بۆ ئاڤا نیوز گوتی: لە حەوت مانگدا هێزە ئەمنییەکان هەزار و سێ تۆمەتبارییان دەستگیر کردووە، 529 تۆمەتباریان بازرگان و 474 تۆمەتباری دیکەیان بەکارهێنەر بوون، هاوکات زیاتر لە 194 کیلۆ گرام ماددەی هۆشبەر دەستی بەسەردا گیراوە.

زانیاریی زیاتر: لە حەوت مانگدا 170 کیلۆ و 842 گرام کریستاڵ دەستی بەسەر داگیراوە کە زۆرترین بووە، لەگەڵ ئەوەدا 653 گرام هێرۆین، 177 گرام حەشیش، زیاتر لە 21 کیلۆگرام تلیاک، یەک کیلۆ و 398 گرام ماریجوانا و 167 گرام جامایکا دەستیان بەسەردا گیراوە.

بۆچی گرنگە: هەرێمی کوردستان بەهۆی هەڵکەوتەی جوگرافییەوە، لەلایەن بازرگانان وەک ناوچەی ترانزێت بۆ گواستنەوەی ماددەی هۆشبەر بەکاردەهێنرێت، دەستگیرکردنی ئەو ژمارە زۆرەی بازرگانان هەنگاوێکی گرنگە بۆ کەمکردنەوەی کاریگەرییەکانی بڵاوبوونەوەی ماددەی هۆشبەر لە هەرێمی کوردستان.