لە غەززە 640  هەزار منداڵ دەکوترێن

ئاڤا نیوز

دوای  تۆمارکردنی یەکەم تووشبووی ڤایرۆسی ئیفلیجی منداڵان لە غەززە، نەتەوەیەکگرتووەکان هەڵمەتێکی کوتانی بۆ 640 هەزار منداڵ ڕاگەیاند.

لێدوانی فەرمی: ماگدی داهیر، سەرۆکی لیژنەی تەکنیکی هەڵمەتەکە ڕایگەیاند: " هەڵمەتەکە لە ناوەڕاستی غەززە لە 1ی مانگ دەستیپێکردووە و تاوەکو 4ی ئەم مانگە بەردەوام دەبێت، پاشان بەرەو باشوور دەڕوات و خان یونس و ڕەفح  و باکووری غەززە دەگرێتەوە".

لە گۆشەیەکی دیکەوە: یوسف ئەبو ئەلریش، جێگری وەزیری تەندروستیی غەززە ڕایگەیاند: "ئەگەر کۆمەڵگەی نێودەوڵەتی بەڕاستی دەیەوێت ئەم هەڵمەتە سەرکەوتوو بێت، دەبێت داوای ئاگربەست بکات، چونکە دەزانێت ئەم ڤایرۆسە ناوەستێت و دەتوانێت بگاتە هەموو شوێنێک."

زانیاریی زیاتر: یەک ملیۆن و 200 هەزار دەرزی ڤاکسین نێردراونەتە غەززە و لەلایەن دوو هەزار و 700 کارمەندی  چاودێریی تەندروستی بە منداڵان دەدرێت،  400 هەزار ژەمی دیکەش دەگەیێنرێنە غەززە.

ئەوەش بزانە: ڕێکخراوی تەندروستیی جیهانی بەهۆی خراپی بارودۆخی تەندروستی و پیسی ژینگەی ئەو وڵاتە، هۆشداری داوە لە بڵاوبوونەوەی زیاتری نەخۆشی ئیفلیجی لە غەززە.