مووچەی خانەنشینی پێشمەرگە و هێزە ئەمنییەکان بە هاوتاکراوی دابەش دەکرێت

ئاڤا نیوز

ئاڤا نیوز لە سەرچاوەیەکی تایبەت زانیاریی دەستکەوتووە، ئەم مانگە مووچەی خانەنشینی پێشمەرگە و پۆلیس و هێزە ئەمنییەکان بە هاوتاکراوی دابەش دەکرێت.

وێنە گەورەکە: یەکەم مانگە لە هەرێمی کوردستان خانەنشینان مووچەکەیان بە هاوتاکراوی وەردەگرن، بەپێی یاسای ژمارەی نۆی خانەنشینی عێراق کەمترین مووچەی خانەنشینی 500 هەزار دینار دەبێت. 

زانیاریی بەدەستهاتوو: سەرچاوەیەک بە ئاڤا نیوزی ڕاگەیاند: خانەنشینانی پێشمەرگە و ناوخۆ مووچەی مانگی تەمموز بە هاوتاکراوی وەردەگرن، بەڵام هێشتا هاوتاکردنی پلە تایبەتەکان ماوە کە لەسەر بنەمای ساڵانی خزمەتیان دەبێت.

زانیاریی زیاتر: ئەو پێشمەرگە خانەنشینانەی مووچەکانیان 300 هەزار دینار بووە، مووچەکانیان دەبێتە 600 هەزار دینار، مووچەی خانەنشینی پۆلیس و هێزە ئەمنییەکان کەمترینی لەنێوان 500 بۆ 600 هەزار دینار دەبێت.

ئەوەی پێویستە بیزانیت: بەگوێرەی خشتەی ڕاگەیێنراوی وەزارەتی دارایی دەبوو ئەمڕۆ سێشەممە خانەنشینانی پێشمەرگە و هێزە ئەمنییەکان مووچەی خانەنشینیان بە هاوتاکراوی فیدڕاڵی وەرگرتایە، بەڵام بەهۆی چەند ڕێکارێک ئەو پرۆسەیە دواکەوت و بڕیارە سبەی مووچەکانیان بەسەر دابەش بکرێت.

باکگراوند: یاسای ژمارەی نۆی خانەنشینی عێراق لە 1-1-2014 چووەتە بواری جێبەجێکردنەوە  و 10 ساڵە کاری پێدەکرێت، لەمەودوا لە هەرێمی کوردستانیش جێبەجێ دەکرێت.