لە چەند پارێزگایەکی عێراق دژی دواکەوتنی مووچە خۆپێشاندان دەکرێت

ئاڤا نیوز

دژی دواکەوتنی خەرجکردنی مووچەکانیان، ئەمڕۆ بەشێک لە فەرمانبەرانی وەزارەتی کارەبا لە پارێزگاکانی بەسرە و زیقار لە باشووری عێراق بایکۆتی دەوامیان کرد و خۆپیشاندانیان ئەنجامدا.

وێنە گەورەکە: مووچەی بەشێک لە فەرمانبەرانی عێراق بۆ چەندین جارە دوادەکەوێت، فەرمانبەرانی کۆمپانیای گواستنەوەی کارەبای باشوور مانگ و نیوێکە مووچەیان وەرنەگرتووە و دەستیان بە بایکۆت و خۆپیشاندان کردووە.

ئەوەی ئێستا ڕوودەدات: فەرمانبەرانی وەزارەتی کارەبا لە هەردوو پارێزگای بەسرە و زیقار خۆپیشاندانیان ئەنجامدا و ڕایانگەیاند، زیاتر دواکەوتنی مووچە هەموو کەرتەکانی دیکەی دەوڵەت ڕووبەڕووی ئیفلیجبوون دەکاتەوە، بۆیە داوا دەکەن هاوشێوەی فەرمانبەرانی دیکەی حکومەت، مووچەیان لەکاتی خۆیدا خەرج بکرێت.

ئەمەش بزانە: حکومەتی عێراق پێشتر لە 22ی هەموو مانگێک دەستی بە دابەشکردنی مووچە دەکرد و لە چەند ڕۆژێکی کەمدا سەرجەم مووچەخۆران مووچەیان وەردەگرت، بەڵام دوو مانگە گرفت دروست بووە و بەشێک لە مووچەخۆران 45 ڕۆژە مووچەیان وەرنەگرتووە.