تورکیا لەبارەی کوژرانی گەشتیارێکی کورد ڕوونکردنەوە بە سەرۆک بارزانی دەدات

ئاڤا نیوز

باڵیۆزی تورکیا لە عێراق ئەمڕۆ سێشەممە لە پیرمام سەردانی سەرۆک بارزانی کرد و لەبارەی کوژرانی گەشتیارێکی کورد لە ئیستەنبوڵ ڕوونکردنەوەی پێدا.

ڕاگەیێنراوی فەرمی: بەپێی ڕاگەیێنراوێکی بارەگای بارزانی، لە دیدارەکەدا بیروڕا لەبارەی بارودۆخی سیاسیی عێراق و ناوچەکە ئاڵوگۆڕ کراوە و باڵیۆزی نوێی تورکیا لە عێراق ویستی وڵاتەکەی بۆ فراوانترکردنی پەیوەندییەکان لەگەڵ عێراق و هەرێمی کوردستان دووپات کردووەتوە، بەتایبەت لە بواری ئابووری و بازرگانی و هەماهەنگیی نێوانیان.

بابەتی سەرەکی: باڵیۆزی تورکیا بەوردی باسی لە تاوانی کوشتنی گەشتیارێکی هەرێمی کوردستان لە تورکیا کردووە و سەرەخۆشی و هاوخەمیی خۆی بە سەرۆک بارزانی و کەسوکاری قوربانییەکە ڕاگەیاندووە.

زانیاریی زیاتر: باڵیۆزی تورکیا بە سەرۆک بارزانی ڕاگەیاندووە: لایەنە پەیوەندیدارەکانی تورکیا بەدواداچوونی تەواویان بۆ ڕووداوەکە کردووە و ڕێکارە یاساییەکان گیراونەتەبەر و سەرجەم تاوانبارانی ئەو ڕووداوە دەستگیرکراون و بەدڵنیاییەوە تاوانباران بە سزای یاسایی خۆیان دەگەن.

لەلایەکی دیکەوە: سەرۆک بارزانی هیوای سەرکەوتنی بۆ باڵیۆزی نوێی تورکیا لە عێراق خواستووە و جەختی لە پەرەپێدانی پەیوەندی و هەماهەنگیی نێوان هەرێمی کوردستان و تورکیا کردووەتەوە.

باکگراوند: ڕۆژی شەممە 31-08-2024، لە شاری ئیستەنبووڵی تورکیا بازرگانێکی کورد بە ناوی 'حەکیم لوقمان' لەلایەن ژمارەی هاووڵاتیی تورک کوژرا و برایەکەیشی بریندار کرا.