دابەزینی نرخی نەوت کێشە بۆ بودجەی عێراق دروستدەکات

ئاڤا نیوز

دابەزینی نرخی نەوتی خاو بۆ کەمتر لە 74 دۆلار کاریگەری لەسەر بودجەی عێراق هەبووە و بەهۆیەوە کورتهێنانی بودجە زیادی کردووە.

وێنە گەورەکە: نرخی بەرمیلێک نەوت لە بازاڕەکانی جیهان بە دەوروبەری 74 دۆلار مامەڵەی پێوەدەکرێت، بەرمیلێک نەوتی عێراقیش بەگوێرەی جۆرەکەی لە نێوان 70 بۆ 72 دۆلار دەفرۆشرێت.

لێدوانی فەرمی: د.نەبیل مەرسوومی، شارەزای ئابووریی عێراق بە ئاڤا نیوزی ڕاگەیاند، هۆکاری دابەزینی نرخی نەوت بۆ کەمبوونەوەی خواستی چین و زیادکردنی هەناردەی نەوت لەلایەن ئۆپیکەوە دەگەڕێتەوە، کە بڕیاری داوە لە مانگی داهاتووەوە 2.2 ملیۆن بەرمیل هەناردەی نەوت زیاد بکات.
  
کاریگەریی و لێکەوتەکان: دابەزینی نرخی نەوت کاریگەریی نەرێنی لەسەر بودجەی عێراق دەبێت، چونکە حکومەتی فیدڕاڵ ئومێدی هەیە 16 ترلیۆن دیناری لە زیادەی نرخی نەوت دەستبکەوێت (لە بودجەدا نرخی نەوت بە 70 دۆلار خەمڵێنراوە)، تا بەهۆیەوە بتوانێت بەشێک لە کورتهێنانی بودجەی پێ پڕبکاتەوە کە ئەمساڵ کورتهێنانی بودجە گەیشتووەتە 64 ترلیۆن دینار.