ڕەنگە سێ یاسا بەیەک پاکێج لە پەرلەمانی عێراق پەسەند بکرێن

ئاڤا نیوز

هەردوو لایەنی شیعە و سوننە لەپەرلەمانی عێراق نزیکبوونەتەوە لەڕێککەوتنێک، دوو یاسا لەدانیشتنێکدا بەیەک پاکێج پەسەند بکەن، لەبەرامبەردا کوردیش پڕۆژە یاسایەکی پێیە.

زانیاریی به‌ده‌ستهاتوو: بەپێی ئەو زانیاریانەی دەست ئاڤا نیوز کەوتووە ئەو سێ یاسایەی پەیوەستن بە یەکترەوە بریتین لە یاسای لێبوردنی گشتی و یاسای باری کەسیی و یاسای گەڕاندنەوەی خاوەندارێتی موڵک و ماڵی داگیرکراو بەفەرمانی ئەنجوومەنی ناسراو بە "قیادەی سەورە"ــی هەڵوەشاوە.

لێدوانی فەرمی: یاسر وەتوت، پەرلەمانتاری عێراق ڕایگەیاند: لایەنە سیاسیەکان نزیکبوونەتەوە لەڕێککەوتنێک بۆ پەسەندکردنی هەردوو یاسای لێبوردنی گشتی و باری کەسیی و یاسایەکی دیکە لەدانیشتنێکی تایبەتی پەرلەماندا بەیەک پاکێج .

لە لایەکی دیکەوە: شوان کەلاری، پەلەمانتاری عێراق لەفراکسیۆنی پارتی بەئاڤا نیوزی گوت: تائێستا ڕێککەوتنی فەرمی لەو بارەیەوە نەکراوە، بەڵام هەردوو لایەنی شیعە و سوننە دەیانەوێت لەچوارچێوەی یاسادا ڕێککەوتنێکی لەو جۆرە بکەن.

زانیاریی زیاتر: بەمافی خۆمانی دەزانین داوای پەسەندکردنی یاسای گەڕاندنەوەی خاوەندارێتی سەرجەم موڵک و ماڵی داگیرکراوی میللەتەکەمان بکەین، ئەگەر ڕێککەوتنێکی لەو جۆرە لەنێوان هەردوو لایەنی شیعە و سوننە کرا. کەلاری ئەمەشی گوت.