خواردنی ماسی لەکاتی دووگیانیدا ئەگەری تووشبوونی منداڵ بە ئۆتیزم کەمدەکاتەوە

ئاڤا نیوز

ماسی سەرچاوەیەکی گرنگی ترشی چەوری ئۆمیگا سێیە، کە ماددەیەکی خۆراکی سەرەکییە لەکاتی دووگیانیدا بۆ پاڵپشتی تەندروستی دایکان و گەشەکردنی کۆئەندامی دەماری کۆرپەلە.

 

چیرۆکی سەرەکی: توێژینەوەیەکی نوێی ئەمریکی دەریخستووە خواردنی هەر بڕە ماسییەک لەکاتی دووگیانیدا ئەگەری تووشبوون بە نەخۆشی ئۆتیزم بە ڕێژەی 20% کەمدەکاتەوە. بەپێی توێژینەوەکە نزیکەی 25%ـی بەشداربووانی دووگیان ڕایانگەیاندووە، لەکاتی دووگیانیدا هەرگیز ماسییان نەخواردووە یان مانگانە کەمتر لە جارێک خواردوویانە، هاوکات  ژمارەیەکی کەمتر لە بەشداربووان ڕایانگەیاندووە، کە تەواوکەری زەیتی ماسییان خواردووە، کە ئۆمیگا سێی تێدایە.

 

لێدوانی فەرمی: دکتۆر ئێمیلی ئۆکەین، مامۆستا لە زانکۆی هارڤارد مێدیکاڵ و توێژەر لە بەرنامەی کاریگەرییە ژینگەییەکان لەسەر دەرئەنجامەکانی تەندروستی منداڵان دەڵێت: "توێژینەوەکەمان بەشدارە لە گەشەسەندنی کۆمەڵێک بەڵگە ئەو ڕۆڵە نیشان دەدەن، کە خۆراکی پێش لەدایکبوون دەتوانێت بیگێڕێت لە دەرئەنجامەکانی پەیوەست بە ئۆتیزم لە منداڵاندا".

 

زانیاریی زیاتر: ئۆتیزم حاڵەتێکی دەمارییە، کە لە سەرەتای تەمەنی منداڵیدا دەردەکەوێت و تایبەتمەندە بە هەندێک کێشە لە کارلێکی کۆمەڵایەتی و پەیوەندیکردندا. توانا و پێداویستییەکانی ئەو کەسانەی ئۆتیزمیان هەیە جیاوازە و بە تێپەڕبوونی کات دەتوانێت گەشە بکات. ڕەنگە هەندێک کەسی تووشبوو بە ئۆتیزم بتوانن چێژ لە ژیانی سەربەخۆ وەربگرن، بەڵام هەندێکی دیکە بەدەست کەمئەندامییەکی توندەوە دەناڵێنن و پێویستیان بە چاودێری و پشتیوانی تەواوی ژیانیان هەیە.