سەرۆکوەزیران بارزانی: لە خولی داهاتووی پەرلەمان مافی پێکهاتەکان دەچەسپێنین

ئاڤا نیوز

سەرۆکوەزیران بارزانی لە چالاکییەکی تایبەت بە نەتەوەی سریان بەڵێن بە پێکهاتەکان دەدات لە خولی داهاتووی پەرلەمانی کوردستان مافەکانیان بەشێوەیەکی شایستە دەچەسپێنن.

 

چیرۆکی سەرەکی: ئەمڕۆ پێنجشەممە لە هەولێر، بە ئامادەبوونی سەرۆکوەزیران مەسرور بارزانی یەکەمین سیمپۆزیۆمی نێودەوڵەتی لەبارەی کولتووری سریان دەستیپێکرد و چوار ڕۆژ بەردەوام دەبێت.

 

لێدوانی فەرمی: سەرۆکوزیران بارزانی گوتارێکی پێشکەش کرد و ڕایگەیاند: "لەم دواییانە هەوڵدرا مافی پێکهاتەکانی هەرێمی کوردستان لەلایەن هەندێک هێزی ناوخۆ و چەند دامەزراوەی فیدراڵی عێراقی پێشێل بکرێت، بەڵام ئێمە بە هەموو توانای خۆمان ڕووبەڕووی ئەو هەوڵ و پیلانانە بووینەوە و سەرەنجام بەشێک لە مافە زەوتکراوەکان گەڕێنرانەوە".

سەرۆکوەزیران بارزانی جەختی کردەوە، لە خولی ئایندەی پەرلەمانی کوردستان کە بڕیارە 20-10ی ئەمساڵ هەڵبژاردن بکرێت،  "پشت بە خودا و خەڵکی نیشتمانپەروەری کوردستان، ماف و نوێنەرایەتیی پێکهاتەکانی کوردستان لە بواری پەرلەمانی و ئیداریی بەشێوەیەکی شایستە دەچەسپێنین".

لەلایەکی دیکەوە: سەرۆکوەزیران بارزانی بە ئاماژەدان بە کولتووری پێکەوەژیان لە کوردستان ڕایگەیاند: "ڕووبەڕووی هەموو جۆرە هزرێکی تووندڕەوی و جیاکاری دەبینەوە، هیوادارم هەموومان پێکەوە کار بۆ پەرەپێدان و بەهێزکردنی پێکەوەژیان و یەکترقبووڵکردن و ڕێزگرتن لەو بەها پیرۆزانە بکەین کە دەبنە هۆی زیاتر پێشخستنی نیشتمانەکەمان و پاراستنی قەوارەی هەرێمی کوردستان".

باکگراوند: سەرەتای ئەمساڵ دادگای باڵای فیدراڵی عێراق لەسەر سکاڵایەکی یەکێتیی نیشتمانیی کوردستان 11 کورسی کۆتای پێکهاتەکانی لە پەرلەمانی کوردستان هەڵوەشاندەوە، دواتر بە فشاری پارتی و پێکهاتەکان لەکۆی 100 کورسییەکەی پەرلەمان 5 کورسی بۆ کۆتاکان تەرخان کرد.