ڕێکخراوی هەنگاو: چالاکوانێکی کورد لە سلێمانی ڕادەستی ئێران کراوە

ئاڤا نیوز

 

بەگوێرەی زانیارییەکانی ڕێکخراوی مافی مرۆڤی هەنگاو، هەفتەی ڕابردوو لە سلێمانییەوە چالاکوانێکی خەڵکی شاری سەقز ڕادەستی کۆماری ئیسلامیی ئێران کراوەتەوە.

 

وێنە گەورەکە: زیاتر لە 40 ساڵە، حیزبەکانی ڕۆژهەڵاتی کوردستان لە ناوچە جیاوازەکانی هەرێمی کوردستان وەک ئۆپۆزسیۆنی ئێران نیشتەجێن و کاری ڕێکخراوەیی دەکەن.

 

زانیاریی بەدەستهاتوو: ئەمڕۆ هەینی، ڕێکخراوی مافی مرۆڤی هەنگاو بڵاوی کردەوە، هەفتەی ڕابردوو چالاکوانێکی خەڵکی سەقز بەناوی بێهزاد خوسرەوی تەمەن 35 ساڵ کە خاوەن پێداویستیی تایبەت بووە و ئەندامی حیزبی دیموکراتی کوردستانی ئێران بووە، هاوکات ئەندامی فەرمی کۆمیسیاری باڵای پەنابەرانی نەتەوەیەکگرتووەکان بووە، دوای دەستگیرکردن و ئەشکەنجەدانی لەلایەن هێزە ئەمنییەکانی سلێمانی ڕادەستی ئێران کراوەتەوە.

 

زانیاریی زیاتر: لە زانیارییەکانی ڕێکخراوی هەنگاو ئەوەش هاتووە، ڕۆژی یەکشەممەی ڕابردوو، ئیتلاعاتی شاری سنە تەلەفۆنیان بۆ برای بێهزاد کردووە و پێیان گوتووە براکەی لەو ناوەندە دەستبەسەرە. هاوکات لە ئاسایشی سلێمانی بە دایک و خوشکی بێهزاد گوتراوە، هۆکاری دەستبەسەرکردنیی بێهزاد بڵاوکردنەوەی وێنەی سەرکردەکانی حیزبی دیموکراتە و داوایان لێکراوە لەماوەی 10 ڕۆژدا سلێمانی بەجێبهێڵن.